La comisión atribúi responsabilidá a dos conseyeros poles quemes de 2015

Guillermo Martínez y María Jesús Álvarez tán ente los responsables políticos

El dictame de la comisión d'investigación al rodiu de la fola de quemes d'avientu de 2015, na qu'hebo 364 focos de fueu que quemaron más de 12.000 hectárees, atribuirá responsabilidaes polítiques a dos conseyeros del Gobiernu rexonal y a otros dos altos cargos.

En concreto, la propuesta de dictame fecha pol presidente de la comisión, el forista Pedro Leal, considera responsables políticos a los titulares de Presidencia y Desendolcu Rural, Guillermo Martínez y María Jesús Álvarez, respectivamente, asina como al director xeneral de Montes, José Antonio Ferrera, y al ex-xerente del Serviciu d'Emerxencies (SEPA) Antonio del Corro.

La iniciativa saldrá alantre col únicu votu a la escontra del PSOE nesti ámbitu, anque PP, IX y Ciudadanos xunieron los sos votos a los de los socialistes pa que'l dictame nun atribuya tamién responsabilidaes polítiques al presidente del Principáu, Javier Fernández, como proponía Foro.

El dictame sedrá aprobáu'l llunes viniente enantes de ser lleváu a plenu y cuntará colos votos particulares del PSOE, que refuga'l conteníu dafechu del testu, y de Foro, que siguirá defendiendo que s'atribuyan responsabilidaes al xefe del Executivu.

Pal presidente de la comisión, la exoneración del presidente "reflexa'l pactu de la vieya política formada por PSOE, PP y IX pa 'salvar al soldáu Fernández'" y caltener al principal responsable d'un gobiernu "inane" al marxe destos sucesos.

A la escontra, el voceru socialista, Marcelino Marcos, llamentó que finalmente se vaya a aprobar "un dictame tendenciosu y que nun tien el más mínimu rigor" dempués de los trabayos d'una comisión que, solliñó, "yá nació cola intención de culpar al Gobiernu y non cola de meyorar la xestión de les quemes forestales".

El testu considera probao que'l Gobiernu activó de forma tardía'l Plan de Quemes (Infopa) y nun atendió a les circunstancies alvertíes dende los servicios d'emerxencies al rodiu de les quemes que yá entamaren nos díes d'enantes.

Amás, insiste en que les midíes de prevención recoyíes na estratexa de llucha escontra les quemes nun s'aplicaron de forma correcta, en que nun hebo convocatoria pa midíes antiquemes nos ayuntamientos y que nun se valoró l'avisu de l'AEMET qu'alertaba de los riesgos de qu'hubiere quemes.

Pal PSOE, el documentu ye "arbitrariu" na narración de los fechos, nun fala de lo que pasó nes comparecencies feches énte la comisión y tien contradicciones al defender que l'Infopa se siga activando p'afrontar la estinción de quemes anque atribúi al plan competencies en materia de prevención.

El voceru socialista foi críticu col PP por apelar a la responsabilidá de la oposición en Galicia énte la última fola de quemes y atribuyir n'Asturies responsabilidaes polítiques a cargos públicos nuna situación asemeyada.

"Si'l PP cree que quitando la responsabilidá del presidente yá se ye un partíu responsable, ta enquivocáu", amestó dempués de señalar que, nel casu de Podemos -qu'apoya tamién ampliar les responsabilidaes a Fernández-, esta formación sí caltuvo "la mesma postura"que defendió nos últimos meses.

Según Foro, Fernández "ye'l principal responsable políticu pola falta de coordinación ente les Conseyeríes de Presidencia y la de Desendolcu Rural", una circunstancia que, a xuiciu de so, repitióse na fola de quemes del mes d'ochobre pasáu.

Tamién el diputáu del PP Rafael Alonso insistió en que l'incumplimientu de la nomada 'Estratexa integral de prevención y llucha escontra les quemes forestales n'Asturies 2013-2016' viose otra vuelta nes últimes selmanes como lo reflexa'l fechu de que'l númberu d'hectárees quemaes n'ochobre de 2017 ye prácticamente igual al qu'hebo n'avientu de 2015.