Radiotelevisión del Principáu d'Asturies Radiotelevisión del Principado de Asturias
Radiotelevisión del Principado de Asturias
RTPA - Radiotelevisión del Principado de Asturias
Fuente: RTPA, 21 de payares. 2017 20:34

El Principáu va destinar más recursos nel presupuestu a les escueles de 0-3

El presidente del Principado de Asturias, Javier Fernández
El Principáu va destinar más recursos nel presupuestu a les escueles de 0-3

Refuga qu'entren na rede pública l'añu que vien

El presidente del Principáu d'Asturies, Javier Fernández, afirmó güei que tien "espectatives" de qu'haya un nuevu presupuestu autonómicu pa 2018.

"Tengo espectatives de que salga'l presupuestu, pero la conseyera (Dolores Carcedo) tien más información y ye más optimista que yo", afirmó Fernández nun almuerzu informativu preguntáu pola negociación de les cuentes públiques pa 2018, qu'agora tán n'alderique con Podemos y IX.

Preguntáu por si la responsabilidá diba cayer na oposición nel casu de que nun saliera alantre'l presupuestu, Fernández dixo que les responsabilidaes "va haber que repartiles", anque precisó que siempre tien más responsabilidá'l gobiernu.

Unu de los requisitos que punxo Podemos sobre la mesa pa dar el so preste al nuevu presupuestu autonómicu foi la integración del ciclu d'educación de 0 a 3 años nel sistema públicu pa que seya universal y gratuitu, daqué que Fernández dixo que "nun se pue faer de manera inmediata".

Según argumentó, hai que "estudiar les posibilidaes pa que dende'l puntu de vista económicu y llegal puea llevase alantre", polo que, hasta agora'l Gobiernu comprométese a "ampliar los recursos" de la rede actual y ameyorala, a pesar de que "nun cumplió les espectatives".

Preguntáu pol costu que supondría esti pidimientu de Podemos, valoró que sedría de "16 millones", pero precisó qu'anguaño tamién participen los conceyos y que de facese darréu estenderíase y parte de la ufierta privada pasaría a la pública, polo que desconoz cuánto dispararía'l costu.

Como "problemes" adicionales citó que se plantegaría que los actuales profesores s'inxertaren como funcionarios.

Na so intervención, el presidente conseñó que nun ye partidariu de la cooficiliadá del asturianu, pero señaló que la FSA-PSOE tomó una decisión y respétala.

"Que naide piense que se va faer no que queda de llexislatura porque me paez una cosa trescendente", destacó Fernández, quien defendió que "hai que ser serios cola xente y nun dar un xiru d'esta dimensión en daqué relevante".

"Yo nun lo llevaba nel programa nin lo llevaría si fuera candidatu", conseñó.

Pela so parte, la conseyera d'Economía y Facienda, Dolores Carcedo, dixo que "cuando hai una negociación abierta siempres hai una posibilidá d'alcuerdu" y van intentar averar postures p'algamar un pactu presupuestariu.

Nel casu de la educación de 0 a 3, indicó que'l PSOE punxo sobre la mesa la necesidá de faer un análisis pa ver por qué modelu de 0 a 3 quier apostase n'Asturies.

Amás, rellató que se comprometen a que nel primer cuatrimestre de 2018 haya un documentu sobro la mesa p'analizar les opciones de la rede, y indicó que se daría cobertura normativa al nuevu modelu a lo llargo la llexislatura.

Mentanto, al traviés del presupuestu siguirá estendiéndose la rede y va revisar la cuota que paguen les families.

Financiamientu autonómicu

Per otru llau, Javier Fernández, abogó por retrasar l'aprobación del nuevu cupu vascu pa que vaiga acompasáu cola negociación del sistema de financiamientu autonómicu y puean afitase "fórmules" pa que País Vascu y Navarra, comunidaes fuera del réxime xeneral, apurran a la solidaridá común.

El presidente asturianu indicó que'l sistema de conciertu vascu y navarru ye una "fórmula de calter confederal a efectos fiscales" que nun cree que "convenga aldericar", pero sí abogó por aldericar sobre los sos resultanos.

El dirixente socialista sostuvo que saber "si esi cupu ye axustáu o non ye la caxa negra de la política española", yá que "naide sabe perbién cómo se calcula", y criticó que nesti sistema "nun va incluyida nenguna participación nos mecanismos de solidaridá" de les comunidaes de financiamientu común.

Frente a la situación actual, sostuvo que "convendría qu'en llugar d'aprobar agora la llei de cupu pa cinco años s'apruebe dientro d'unos meses cuando tamién se tea axustando'l sistema de financiamientu autonómicu" y asina se vería la "fórmula" pa que dende'l cupu se tresfirieran recursos a les comunidaes y al sistema de financiamientu de servicios públicos esenciales.

En respuesta a otres entrugues, el presidente del Principáu tamién se refirió Plan Demográficu d'Asturies pa sorrayar que la so aprobación ye " absolutamente imprescindible", anque reconoció que "nun espera que seya la panacea de nada".

Fernández dixo que'l declive demográficu ye "el problema medular que tien Asturies", yá que'l 24 por cientu de la población tien más de 65 años.

Cataluña

Per otra parte, Javier Fernández, espresó la so "negativa fonda" a la estensión del modelu de conciertu económicu a Cataluña como un "apañu" pa solucionar el "conflictu catalán", yá que xeneraría comunidaes autónomes ganadores y perdedores, y alvirtió de que nun va aceptar qu'Asturies seya una de les perdedores.

Fernández afirmó que'l de Cataluña ye "un problema de toos" y fixo una radiografía de los daños "evidentes, probables, tentaciones y los daños ocultos", qu'al so xuiciu, trai esta situación.

Nel marcu de les "tentaciones" preguntóse si ye "malpensáu" al camentar la posibilidá de que "l'apañu económicu" puea formar parte de les ufiertes de solución al "conflictu catalán" p'amosar de siguío la so "negativa dafechu tanto a la estensión del modelu de conciertu como a un alcuerdu billateral ente la Generalitat y el Gobiernu d'España sobro les condiciones de financiamientu de Cataluña".

Según alvirtió, ello fadría que'l réxime común, nel que ta enmarcáu Asturies, fuera namás "el pequeñu réxime de les comunidaes ensin privilexos".

"El financiamientu autonómicu y el modelu d'Estáu son indisociables", destacó'l presidente, qu'indicó qu'agora la Constitución reconoz la singularidá foral y si esi réxime s'esparde va haber "grandes ganadores y grandes perdedores netos" y él, alvirtió, nun acepta "de nenguna manera qu'Asturies puea formar parte del pelotón de perdedores".

banner publicidad

© 2024 Radiotelevisión del Principado de Asturias | Todos los derechos reservados

Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL