RTPA: clave de fondo

RTPA - Radio Televisión del Principado de Asturias

Clave de fondo - Xuan Bello - Chema'l de la Mar del Medio

Conocidísimo restaurador del Oviedo Antiguo. La experiencia de Chema transciende con mucho los límites de su profesión. Testigo de la historia de Asturias desde los años 60, abrió en los años 80 el Tigre Juan, un bar al que estuvo vinculado el premio literario de su mismo nombre.

La entrevista según Xuan Bello

Nun me quería dicir cómo s'apellidaba y enteréme, díes depués, que'l so nome completu yera José María González.

--Total, qué más te da: tol mundu me conoz por Chema, Chema'l de la Mar del Medio o Chema'l de Cecea. Hasta mio madre me llama asina. Tu pon ehí que me llamó asina: Chema'l de la Mar del Medio –dizme tres la entrevista mentes tomamos un vasín de vino.

Ye de Cecea, ún de los llugares más guapos del conceyu de Nava. Estudio Químiques naquellos años 60 y, siguiéndo la brúxula de l'aventura, arrincó pa París l'añu de la revolución de mayu. Llegó en diciembre y recuerda una ciudá metida n'augua, fosca, terrible y, con too, incitante. Buscó, pero ellí namás vio adoquines que nun ocultaben playa nenguna.

Testigu d'aquellos años y los de la Transición, vio con sorna que nun disimula la evolución de los tiempos y de les persones. Optimista, cultiva una imaxe de vieyu marineru, de capitán Haddock, de persona que siempre ta moviéndose pa parar un momentín y charlar un cachu. Confía,como los vieyos marineros y los campesinos de toles latitúes, nos efectos de los vientos y la lluna nel clima: la verdá, ye que suel acertar nes sos previsiones.

Ye'l dueñu de la Mar del Medio, ún de los meyores restaurantes del país. Unos años enantes rexentó'l Tigre Juan, ún d'esos bares que depués de que pesllaran siguen abiertos nel alma de l'alcordanza. Viaxó, viaxó muncho: na mocedá, cola gaita a cuestes (foi ún de los primeros gaiteros renovadores); depués cargó al llombu la sorna que lu caracteriza y l'amor y curiosidá por toles coses de la tierra.

Sabe que les coses importantes que socedieron nel pasáu siguen socediendo siempre. Como aquel casu d'un vecín suyu, de Cecea, qu'emigró na década de los venti del pasáu sieglu a Bonos Aires. Otru más, pero aquel home yá fixera los 80 años. Tuvo per ellí un tiempu, unos meses, y volvió pa l'aldea. Preguntáben-y que cómo yera aquello y aquel paisanu contestaba que mui guapo. Unes avenides mui precioses, una barbaridá d'ensuañu, argumentaba en chigre del pueblu.

--Pero entós, ¿cómo ye que volvió tan llueu?, dicíen-y los vecinos.

--Home, ye qu'ellí nun había conversación –contestó.