Clave de fondo

La entrevista según Xuan Bello

Martín López-Vega cultiva aficiones secretes que se podíen resumir n'ansia de mundu: viaxar ye una d'elles, otra la lliteratura. Dacuando viaxar y lleer son lo mesmo: un intentu de busca, de trespasar la superficie de la realidá pa llegar –ai, la intensidá-- onde dacuando se llega. L'autor d'Adulto extranjero, ún d'esos llibros qu'hai que lleer pa entender la contemporaneidá, vivió en Portugal y n'Italia, conoz bien centroeuropa y domina delles llingües. Coindidí mui bien delles veces con él de viaxe y la parolada, dende entós, estendióse ente nós acompañando muncho. Últimamente, porque la vida escueye sabia los escenarios afayadizos, solenos venos na mio cocina. Mentes yo preparo la cena, falamos: esti foi l'escenariu de la conversaciíon última que mantuvimos.

Les dunes de Fão, que cantó Eugénio de Andrade, son el pretestu p'arricar a falar: la conversación como un duviellu, el mundu como un llaberintu de palabres del que nunca se quier salir.A Martín López-Vega, ún de los mayores poetes españoles del momentu, interésa-y la lliteratura en cuanto valga pa vivir. Entiende, asina, la poesía como l'arte del bon vivir (anque esi bon vivir sía, tou hai que dicilo, un vivir más profundo, más consciente). El meyor poema, parez dicinos, ye'l que socede na vida: la meyor tormenta la que truena nel platu de la nuestra alma.

Posiblemente se trate esta d'una conversación privada. Entiéndalo asina l'oyente agora que s'esponen en público en busca de dalgo indifenible. López-Vega, cultu y sabiu, tararea un cantar de Franco Battiato con lletra de Claude Roy.