Clave de fondo

La entrevista según Xuan Bello

La fraxilidá aparente d'Esther Prieto, al mio xuiciu una de les voces más personales de la reciente lliteratura en llingua asturiana, sorraya la so fortaleza. Segura na dulda, con mui poques certeces, analiza la vida dende una perspectiva non por decepcionada menos alerta a la bondá del mundu. Nel momentu nel que facemos la entrevista, nel so despachu na Editorial Trabe, onde trabaya dende va años, tien delles sorpreses lliteraries: volvió a escribir poemes (lo que supón una noticia de primer orde) y acaba de recibir Avó Ismail, la traducción gallega de la so novelina Güelu Ismail.

Falamos, falamos, falamos; quier dicise, matizamos sobreentendíos. Ye mui corriente que quien trabaya nuna editorial (lleendo y corrixendo manuscritos, escribiendo solapes comerciales y encargándose de los barullos de la imprenta y les llibreríes) acabe perdiendo la fe na lliteratura. Nun ye'l casu de l'autora de La edá de la memoria y La mala suerte, dos llibros excepcionales de los que se ta preparando una edición castellana; nun ye esi'l destín de quien, atenta como naide a la novedá de la esistencia, sigue pela nueche contando les sílabes del suañu.

La obra de Prieto, rigurosa y exacta, con una llingua natural que se safa de la experimentación gratuita, crez como un árbol mui lentamente: como ellos, va medrando n'aniellos concéntricos aportando a la intensidá que procura'l poema tiempu y reposu. Esperamos con impaciencia'l prósimu llibru de so: un llibru que se va componiendo a poco y a poco, sele, como quien escribe palabres que se sabe que se van recordar.