Quexes énte la falta de docentes nel entamu de cursu

El profesoráu del Calderón protagoniza una protesta y esixe midíes

El profesoráu del Institutu Calderón de la Barca, en Xixón, manifestóse esta mañana delantre del centru.

Denuncien que'l cursu escolar entamó con 14 docentes menos de los necesarios. Calculen que ye un 20% menos de lo que fai falta pa cubrir la plantiya.

Una situación, apunten, que yá ta repercutiendo na calidá de la enseñanza de los alumnos.

Tán ablucaos con esti retrasu na axudicación de les interinidaes y dicen nun entender esta situación porque dalgunes de les baxes yá se conocíen en xunu.

Esixen midíes darréu, porque calculen que nun sedrá hasta finales d'esti mes cuando se corrixa esta situación.

CCOO amiéstase a les quexes

Per parte de so, Comisiones Obreres tamién s'amestó a les quexes pola falta de personal docente nel entamu del cursu escolar.

El so secretariu xeneral, José Manuel Zapico, fizo un llamamientu a les fuercies de la izquierda pa qu'algamen alcuerdos que puean evitar situaciones d'esti tipu.