Riesgu estremu de quemes n'Asturies, según l'Aemet

Espertos alerten de la necesidá d'invertir en prevención y planificación

Asturies, con Andalucía occidental, parte del País Vascu, de Navarra, de Cataluña y d'Estremadura tarán güei y mañana nel nivel "estremu" de riesgos de quemes forestales, según l'Axencia Estatal de Meteoroloxía.

Los datos meteorolóxicos y los modelos numbéricos de predicción del tiempu de l'Aemet reflexen un riesgu estremu de quemes forestales nel suroeste del país, sobre manera n'Andalucía, onde les provincies de Huelva, parte de Sevilla, Cádiz, Málaga y Córdoba son les más amenazaes.

La mesma situación dase nel noroeste de la península, onde toles provincies de Galicia y el Principáu d'Asturies tán n'alerta máxima. Na fastera norte, Bilbao y San Sebastián, dientro del País Vascu, son los llugares con mayor nivel de riesgu, a los que s'amiesta la rexón interior de Cataluña.

Les demás comunidaes siguen güei nel nivel altu de riesgu de quemes, sobre manera'l norte d'Estremadura, Castiella y Lleón, Castiella-La Mancha -menos Ciudá Real, con nivel de riesgu baxu-, Murcia y la Comunidá Valenciana. Según l'Aemet, los niveles baxarán nel día de mañana, sobre manera na fastera central de la península, onde dirán de baxu a moderáu.

Espertos alerten de la necesidá d'invertir en prevención y planificación

La quema de Pedrogao Grande en Portugal pon n'alerta a los inxenieros forestales de toa España. N'Asturias, les llapes nun son tan virulentes pero naide nun nos quita de sufrir una catástrofe d'esi calibre. Los espertos alvierten, el conceptu de monte ta camudando y eso medra la peligrosidá.

El decanu territorial d'Asturies del Colexu d'Ixgenieros Forestales, David Barraso, asegura que la prevención y la planificación son la clave pa evitar qu'haya quemes tan mortíferes n'Asturies. Hai munches fasteres na rexón con cases arrodiaes de vexetación. Hai falta de xestión y de desbroce denuncien, nin los cortafueos nin les carreteres (onde se vieron atrapaes munches persones nel siniestru), podríen valir pa frenar la combustión. Les llapes puen llegar a tener el doblu d'altura que los árboles.

Portugal foi protagonista na 54 Asamblea xeneral del colexu d'Inxenieros Forestales que se celebró ayeri en L.lena. L'oxetivu de los que trabayen na materia ye salvaguardar la vida de les persones pero nun s'algamó. Nel país vecín hai polo menos 62 finaos y otros tantos mancaos, unes cifres qu'amarguen a los espertos. Piden más inversión pa prevenir les llapes y más profesionalización a la hora d'apagales.