CAC-Asprocon asume'l retu de "avanzar hacia la optimización empresarial"

Ramón Montero, nuevu presidente de la Confederación Asturiana de la Construcción

El presidente de la Confederación Asturiana de la Construcción (CAC-Asprocon), Ramón Montero, conseñó que'l principal retu de la so nueva etapa al frente de la patronal sedrá "avanzar" hacia la optimización empresarial y "potenciar" la comunicación coles entidaes públiques.

Montero, que güei tomó posesión del cargu na clausura de l'Asamblea Estraordinaria de l'asociación empresarial, celebráu nel Hotel Reconquista d'Uviéu, declaró que'l sector tien que ser una garantía de "preciu, calidá y serviciu", polo que se marcó como oxetivu la mengua de costos y la medría de la productividá.

Amás, apuntó que tratará de "potenciar" la collaboración granible con entidaes públiques, yá seyan financieres o educatives, cola alministración y los sindicatos, yá que "la rapidez" cola qu'evoluciona'l sector hacia l'ámbitu tecnolóxicu obliga a medrar la ufierta formativa y, polo tanto, la comunicación con estes entidaes.

Per otra parte, esplicó que, a pesar de la necesidá d'una "renovación", obligada polos tiempos que cuerren, la so etapa caltendrá una llinia "continuista", yá que considera que sedría "una torpeza" pela so parte, prescindir del "magníficu" trabayu que llevó alantre'l so predecesor, Serafín Abilio, en 34 años.

Montero también asumió'l l retu de "defender y dignificar el sector", al que s'acusó "inxustamente", dende'l so puntu de vista, de ser el causante de la crisis, y al que se venceyó con "la corrupción" y la especulación.

Pela so parte, el conseyeru d'Infraestructures, Ordenación del Territoriu y Mediuambiente, Fernando Lastra, reiteró la necesidá de "trabayar pa que'l cambiu seya buenu", anunció que, dende la so Conseyería, tratará de facer medrar "l'axilidá y la inversión" pal beneficiu del sector y ufiertó la so "collaboración y interllocución" pa que seya una etapa "enllena d'éxitos".

Na so intervención, na que faló del desafíu independentista en Cataluña, conseñó que la nueva dirección ta ante un retu d'una dimensión "bien grande", anque amosó'l so enfotu y esperanza nella, y quixo agradecer a Serafín Abilio por tolo que "apurrió" en beneficiu del sector na so etapa al mandu de la patronal.

El yá ex-presidente de CAC-Asprocon amosóse "satisfechu" de la so etapa al frente de la patronal de la construcción, na qu'hebo "aciertos y erros" pero que, a la so manera de ver, ciérrase con un balance "positivu".