Lastra buscará un diálogu "constructivu y abiertu"

Javier Fernández llamenta la "ruindá" de la oposición

El presidente del Principáu, Javier Fernández, llamentó güei la "ruindá" de la oposición tanto col nuevu conseyeru d'Infraestructures, Fernando Lastra, enantes inclusive de que tomare posesión del cargu, como cola so antecesora, Belén Fernández, que dimitió la pasada selmana.

Na so intervención na toma de posesión de Lastra, que prometió'l so cargu en presencia de los miembros del Executivu, altos cargos de la Conseyería, diputaos del PSOE y otres autoridaes, el xefe del Executivu criticó que la oposición parllamentaria nin siquiera lu dexó llegar al puestu p'atacalu

Esta actitú reproduz, según Fernández, la que caltuvieron cola so predecesora, a la que nun reconocieron "nin el so conocimientu nin les ganes de facer coses" y llegaron a pidi-y esplicaciones "por nun arreglar lo qu'ellos mesmos nun-y dexaben solucionar".

Fernández llamentó "tanta ruindá" y agradeció a la ex-conseyera'l so llabor al empar que garantizó a Lastra, al que se referió como "amigu Fernando", el plenu respaldu del Gobiernu y amosóse convencíu de que sabrá utilizar la so capacidá pa facer un bon llaboral frente d'Infraestructures.

El presidente aseguró que se plantegaba pone-y el llistón "altu" a Lastra del qu'afirmó esperar "muncho" y xustificó esta elevación de les espectatives de la so futura xestión nel fechu de qu'acreitó la so capacidá n'años "con una capacidá política y dialéctica sobresaliente".

Amás de la conclusión de les grandes infraestructures pendientes, Fernández punxo como prioridaes a Lastra la conciliación del desendolcu industrial cola esixencia d'una mayor calidá ambiental y la ordenación del área metropolitana "necesaria pa impulsar el desendolcu de l'Asturies del sieglu XXI".

Tres tomar posesión del cargu, el nuevu conseyeru señaló a los periodistes que buscaría un diálogu "constructivu y abiertu" colos partíos de la oposición, a los que pidió "compromisu políticu y altura de mires" pa resolver los problemes "con responsabilidá y sentíu".

"Hai daqué que ye grande na vida política que ye'l sentíu de la cooperación y la llealtá institucional, los problemes son d'Asturies y de los asturianos y toos tamos implicaos en dellos niveles", apuntó Lastra.

Tres señalar que la Conseyería tien un gran equipu políticu y profesional, Lastra insistió en caltener "una rellación normal" colos representantes de les distintes instituciones y recordó qu'esta mesma tarde caltendrá la so primera xunta como conseyeru cola alcaldesa de Xixón, Carmen Moriyón.

Na mesma llinia situó les rellaciones col Ministeriu de Fomentu, col qu'abogó por buscar "una solución clara, abierta y tresparente" al problema del tresporte de mercancíes tres la decisión del Gobiernu central d'aplicar anchu internacional na variante ferroviaria de Payares y aplazar la so apertura hasta 2021.

A xuiciu de so, resolver les incógnites al rodiu del tresporte de mercancíes, que col proyectu del Ministeriu deberá circular pela antigua rampla de Payares, resulta "importante" pa garantizar la competitividá de la economía asturiana y, al igual que nel ámbitu de les cercaníes, comprometióse a ser "esixente y rigurosu" nes sos reivindicaciones énte Fomentu.

Lastra (Cangas del Narcea, 1958), ye llicenciáu en Filosofía, Ciencies de la Educación y Pedagoxía pola Universidá d'Uviéu, ye diputáu nel Parllamentu asturianu dende 1987, onde foi portavoz del PSOE dende 2004, y foi tamién secretariu de Política Municipal de la Federación Socialista Asturiana (FSA-PSOE).

La so antecesora nel cargu yera la integrante más veterana del Executivu asturianu d'anguaño porque formaba parte d'él con delles responsabilidaes dende l'añu 2007, con Vicente Álvarez Areces como presidente, y renunció al so cargu "por motivos personales", según el Gobiernu, tres ser reprobada na Xunta Xeneral polos demás grupos parllamentarios el pasáu 12 de mayu.