Asturies, llista p'afitar la Hestoria Social Única Electrónica

Aseméyase a la hestoria clínica, pero centrada nel ámbitu de los servicios sociales

El parlamentu asturianu aprobó esti vienres por unanimidá un cambéu de la Llei de Servicios Sociales que va permitir el desarrollu y la implantación de la Hestoria Social Única Electrónica (HSUE) en tola comunidá.

La HSUE ye asemeyada a la hestoria clínica, pero centrada nel ámbitu de los servicios sociales, y con ella quier tener accesu centralizáu y en formatu electrónicu al conxuntu d'información y documentos que contienen los datos, les valoraciones y les informaciones sobre la situación y la evolución de l'atención social de los usuarios del sistema asturianu.

Esta ferramienta quier ser un elementu fundamental y estratéxicu pal desenvolvimientu del sistema públicu de servicios sociales y ameyorar la coordinación de los profesionales del ámbitu local y rexonal permitiendo una mayor axilidá y meyora de l'atención a les persones que piden estos sofitos.