Asturies rexistra seis denuncies al añu por usu illegal de software n'empreses

En tres de los casos empecipiáronse acciones llegales

La empresa asturiana d'inxeniería Ales (Xixón) foi denunciada por usar software illegal. En rexistrando la so sede'l pasáu 11 de mayu, los péritos pescudaron 36 ordenadores y detectaron software presuntamente illegal por valir d'ente 150 y 200.000 euros polo que s'empecipió una accion llegal escontra esta empresa d'inxeniería, dedicada al diseñu y a la fabricación d'estructures metáliques.

La denuncia llegó al consorciu BSA n'España, una entidá qu'arrexunta a empreses del ámbitu informáticu y qu'inclúi a grandes multinacionales como Apple, Microsoft o Adobe.

No que va d'añu, n'Asturies rexistráronse yá seis denuncies por software illegal n'empreses. Na metá, empecipiáronse acciones llegales escontra la compañía.

La cifra medra añu a añu. En menos de cinco meses superáronse yá la metá de les denuncies de 2017. Un añu que foi récord pal consorciu BSA.

N'España rexistráronse 576, un 14% más que l'añu anterior y la cifra dispárase con respecto a 2014. En namás tres años la medría de denuncies foi de más d'un 80%.

Los sos datos apunten a que n'España cuatro de cada 10 programes de software usaos n'empreses nun cunten cola llicencia necesaria y los procesos llegales, munches vegaes, acaben en condena.

En 2016 el Tribunal Supremu confirmó la multa impuesta a una empresa de diseñu de Xixón.