Asturies tien garantizáu’l suministru d’agua pese a la poca lluvia

Cadasa solliña que se xestionaron bien los recursos

Los embalses qu’abastecen d’agua a la mayor parte d’Asturies, los de Tanes y Rusecu, tienen capacidá abonda pa suministrar agua a la zona central de la rexón, o lo que ye lo mesmo, a 850.000 asturianos, nos meses vinientes anque nun llueva.

Tán nel tope máximu de la so capacidá con 255 hectómetros cúbicos embalsaos.

El conceyu de Xixón consume unos 22 hectómetros cúbicos al añu. Ye un datu que contrasta con rexones vecines como Galicia, onde entamaron les restricciones, y Cantabria, onde en zones altes, que se nutren de nacientes, entamaron a tener problemes.

El motivu, dicen dende’l Consorciu d’Agua d’Asturies (Cadasa), ye que se ficieron bien les coses. L’últimu añu nel qu’hebo problemes col agua foi en 2015.

Esti consorciu abastez, amás d’a les más de les cases asturianes, a les grandes empreses. Namái Arcelor consume tanta agua como tol conceyu de Xixón.

Dende’l Principáu señalen la necesidá de facer un consumu racional del agua anque nun haya problema d’abastecimientu. Daqué no que los asturianos se concienciaron, porque na última década’l consumu nes cases amenorgó cerca d’un 20%.