Cadasa y ArcelorMittal garanticen el suministru d’agua na fastera central

L’alcuerdu afita les condiciones pal usu compartíu de la Canal del Narcea

El Consorciu pal Abastecimientu d’Agua y Saneamientu (Cadasa) y ArcelorMittal roblaron güei l’alcuerdu de garantía d’abastecimientu d’agua al traviés de la Canal del Narcea, pol qu’aseguren el suministru d’agua a tola zona central del Principáu d’Asturies.

El conseyeru d’Infraestructures, Ordenación del Territoriu y Mediuambiente y presidente de Cadasa, Fernando Lastra, el presidente d’ArcelorMittal España, José Manuel Arias, y el director xeneral de la compañía, Oswaldo Suárez, roblaron güei l’alcuerdu nun actu nel salón d’actos del Ridea.

Esti alcuerdu afita les condiciones pal usu compartíu de la Canal del Narcea, con unos costos "que son adayadizos pal consorciu y los sos integrantes", y asegura’l suministru a les instalaciones de la siderúrxica en Xixón, esplicó Lastra.

Sicasí, destacó qu’esti conveniu permite l’aprovechamientu afayadizu d’una infraestructura yá esistente, que tien un gran valor material y estratéxicu p’Asturies, y garantiza l’agua ensin falta de facer "grandes inversiones en nueves infraestructures".

Per parte de so, Arias declaró qu’esti alcuerdu ye’l reflexu del compromisu d’ArcelorMittal pola sostenibilidá ambiental, y que ye frutu del "bon clima de collaboración" de la compañía col Gobiernu rexonal.

El documentu robláu supón el primer pasu pa la constitución nos meses vinientes de la Comunidá d’Usuarios del ríu Narcea, que se formará en cumplimientu de la Llei d’Agua pa los bienes de dominiu hidráulicu, y que deberá cuntar col preste de la Confederación Hidrográfica del Norte.

La Canal del Narcea ye propiedá d’ArcelorMittal, construyida en 1965 pa suministrar a les sos plantes d’Avilés y Xixón cola conexón de la estación de bombéu del ríu, y cuenta con una conducción hidráulica de cuasi 30 kilómetros que va pelos conceyos de Pravia, Sotu’l Barcu, Castrillón, Illas y Corvera, y que ta formada por 35 acueductos, 15 túneles y 5 sifones.

La compañía pondrá a disposición del consorciu un volume de 3,8 hectómetros cúbicos al mes y de 16,7 hectómetros cúbicos al añu, con un caudal máximu de 1.500 llitros per segundu nes hores del mes.