Vilanova y Rosón nieguen participar na ocupación de La Madreña

Fiscalía pide una multa de 1.440 euros pa caún de los 10 acusaos

El diputáu rexonal de Podemos Asturies, Andrés Fernández Vilanova, y el conceyal d’Economía d’Uviéu, Rubén Rosón, que güei son xulgaos nel Tribunal Cimeru de Xusticia d’Asturies pola ocupación de La Madreña, negaron la so participación na ocupación del edificiu, asina como tener conocencia de les persones que lu ocuparon.

Fernández Vilanova, que foi’l primeru de los 10 acusaos en declarar, señaló que participó nes actividaes del centru "al mes de la so apertura", y que collaboró ordenando la ropa del depósitu y xuguetes, y que foi a charres y conciertos, ente otros.

Al respective del día del desaloxu, reconoció que taba dientro del centru, anque apuntó que nun durmió ellí, porque pasó tola nueche estudiando les sos "materies de pediatría".

Amás, declaró que la puerta "siempres taba abierta", a pesar de que’l día del desaloxu la valla taba zarrada con un candáu y les puertes bloquiaes con tabiques y armarios.

Sobre esti asuntu, solliñó que nun vio a naide zarrar el centru aquel día, porque cuando entró taba la "vía llibre" y nesi momentu taba na parte cimera del edificiu estudiando.

Na so declaración, que fizo alternando el castellanu y l’asturianu, defendió que La Madreña yera un centru abiertu a tol mundu, que facía actividaes de baldre, y que nengunu de los que collaboraba nél "s’escondía" d’ello.

Per parte de si, Rosón almitió que La Madreña yera un centru nel que se facíen actividaes de calter social, anque insistió en que nun había nengún colectivu que lu dirixere, porque tolo que s’entamaba nacía de les persones que diben ellí dalguna vegada.

No que cinca al estáu del edificiu a la so llegada, dixo que taba abandonáu dafechu, con espedientes alministrativos y sanitarios tiraos, y ensin nengún tipu de guarda o personal de seguridá que-yos alvirtiere o impidiere la entrada.

A pesar de que reconoció la so participación nes asamblees, y de que’l fiscal lleó cachos d’actes de les mesmes nes que se fala de grupos de xestión del centru, negó tener conocencia d’ello, asina como de collaborar na so fechura.

Al respective del incidente policial del día 16 de payares, aseguró qu’aquel día nun tuvo nel centru nin foi identificáu polos axentes, poro, señaló que "tien que ser un erru" del escritu.

Al igual que Vilanova, declaró que’l día del desaloxu alcontró la puerta abierta, ensin nenguna torga o candáu, y negó conocer quién bloqueó la valla y la entrada al edificiu.

Los 10 acusaos, Rosón y el propiu Vilanova, contaron col sofitu de dellos compañeros de partíu y d’usuarios del centru, qu’abarrotaron la sala na que se celebró la sesión.

Enantes del xuiciu celebróse una concentración de sofitu a los encausaos fuera de la sede del Tribunal Cimeru de Xusticia.

Ellí diéronse cita dellos diputaos de Podemos como Emilio León, Daniel Ripa y Enrique López amás d’un grupu numberosu de persones que prestaron el so sofitu a los activistes de La Madreña.

Nel actu coreáronse consignes en favor del movimientu asociativu que s’instaló na antigua conseyería de Sanidá n’Uviéu.

Nesta causa, la Fiscalía solicita la imposición d’una multa de 1.440 euros pa caún de los diez integrantes del movimientu La Madreña acusaos d’un delitu d’usurpación.

Nel so escritu, el fiscal relata que los acusaos ocuparon l’edificiu, asitiáu nel númberu 32 de la cai Xeneral Elorza d’Uviéu y deshabitáu’l 15 de payares de 2011, ensin contar con autorización del propietariu, la empresa pública Sedes, y col "ánimu d’usalu de forma permanente pa fines personales".

Dempués d’ocupar l’edificiu, los acusaos colocaron cartelos nes ventanes y valles de la finca coles lleendes "okupación temporal", "espaciu llibre 15 M", "un desahuciu una okupación", "garra lo que ye tuyu" y otres asemeyaes.

La Fiscalía conseña que’l colectivu de persones, del que formaben parte activa los diez acusaos, "ensin solicitar nin tener nengún permisu del titular del edificiu, entamó a facer nél, de forma permanente y continuada, xuntes, charres y otres actividaes a les que fueron delles persones", hasta que l’inmueble foi desaloxáu pola Policía Nacional el 3 de xunu de 2014.