El 'campanu' de la mar bate récord

La puya del primer bonitu de la temporada algama los 300,20 euros el kilo

El primer bonitu del Cantábricu de la temporada rulóse güei na rula d'Avilés al preciu récord de 300,20 euros el kilo, frente a los 134,20 del pasáu añu, cuando yá paecía que s'abandonaba la escalada de precios, según informó a Efe'l xerente de la rula local, Ramón Álvarez.

Ye'l preciu del primer recipiente, de 122 kilos, que compró la cadena Alimerka, que finalmente compró 5.500 kilos, de los 7.500 subastaos, yá a un preciu aproximáu d'unos 17 euros el kilo.

Los 7.500 kilos del primer bonitu de la temporada llegaron a bordu del "Nuevo Chisu", "Esmeralda Tercero" y "Berriz Amatxo", vinientes de Les Azores.

Tradicionalmente, Avilés recibe nel so cai pesqueru les primeres captures de la temporada y lleguen a rulase a precios mui elevaos.

Estos pesqueros, avezaos na rula avilesina, entamen una espedición d'ente cuatro y cinco díes en busca de los primeros de la campaña.

Aunque'l bonitu pue ser garrao por embarcaciones artesanales y vendese nel día, los boniteros qu'aprovechen la costera puen pescar dellos díes; nestos casos, el productu caltiénse en bodegues, perfectamente refrixerao y conservando toles sos propiedaes.

"Ye material mui bueno, de primera, vienen d'una travesía de cuatro o cinco díes", declaró'l xerente de la rula.