El PP recurre ante'l TCXA l'usu del asturianu como llingua vehicular

El Gobiernu critica'l "ánimu persecutoriu" del PP col asturianu

La Sala de lo Contencioso Alministrativo del Tribunal Cimeru de Xusticia d'Asturies (TCXA) almitió a trámite'l recursu interpuestu pol Partido Popular escontra'l plan pilotu diseñáu pola Conseyería d'Educación pa que se puea usar l'asturianu como llingua vehicular nes escueles, a pesar de que nun ye oficial.

El PP yá anunciara hai tres selmanes que diba llevar a los tribunales esti plan esperimental por considerar que nun s'axusta nin a la normativa estatal nin a la llei que regula l'usu y promoción del asturianu.

L'anunciu foi fechu güei pol voceru d'Educación del PP na Xunta Xeneral del Principáu, David Medina, que desplicó que'l recursu presentóse cola resolución asoleyada nel Boletín Oficial del Principáu'l pasáu 13 de xunu na que se desarrolla'l conteníu d'esti plan pilotu.

Según Medina, el recursu non solo se presenta porque consideren que ye illegal l'usu del asturianu como llingua vehicular sinón pola "falta dafechu de diálogu del Gobiernu" nesti asuntu.

Según Medina, el plan pilotu que finalmente se plantega dende la Conseyería d'Educación "va ser la metá de la metá" de lo que dixeron de primeres porque'l mesmu conseyeru, Genaro Alonso, "ye consciente de que nun se pue facer".

De mano, esti proyectu esperimental diba llevase alantre en diez escueles pa que los alumnos pudieren recibir n'asturianu la metá de les clases, plan que finalmente menguóse a seis centros escolares pa que los alumnos de cuartu de Primaria reciban nesa llingua les asignatures de ciencies sociales, naturales, educación física o artística.

Según Medina, esti plan nun ye una necesidá pa les families y escolinos y namás quier "meter per detrás la cooficialidá del asturianu" y inxertar "adulces la obligación d'estudiar l'asturianu".

El voceru del Gobiernu asturianu, Guillermo Martínez, aseguró güei que'l recursu del PP al plan pilotu pal usu del asturianu como llingua vehicular respuende a "un ánimu persecutoriu" escontra la llingua.

Según el voceru del Gobiernu, esti plan ta amparáu pola llegalidá porque se basa siempre na "voluntariedá" de padres, alumnos y profesores p'acoyese al mesmu.