L'aeropuertu d'Asturies estrena la so temporada cola oficina d’información zarrada

Presenta la mayor ufierta de vuelos internacionales de la so historia

L'aeropuertu asturianu estrenó güei la so temporada de primavera-branu y, pa sorpresa de los veceros, fízolo cola oficina d’información zarrada.

Nun ye la primer vegada qu’esto pasa por falta de personal, inclusive en feches con más movimientu de viaxeros, como’l pasáu 15 d’agostu.

Los trabayadores de les compañíes quéxense d’esa falta de serviciu y tamién los usuarios que nun tienen a quien consultar sobre los sos vuelos, nin onde interponer les sos quexes.

Esti entamu de temporada desendolcóse con normalidá y con más afluencia de pasaxeros qu’un domingu normal.
L’aeropuertu asturianu tendrá conexones con seis países internacionales. La más nueva ye la de'Alemaña, qu'entamará'l próximu 26 de mayu cola compañía Volotea.

Munich amiéstase a Xinebra, Lisboa, París, Venecia y tres aeródromos de Londres. Xunto a les rutes internes sumen un total de 22 destinos.

Les compañíes aérees programaron nel aeropuertu d'Asturies unos 7.500 vuelos con más de 1.152.000 asientos pa la temporada de branu, lo que supón medríes del 7,2 y del 5,8 por cientu, respectivamente, al respective de la mesma campaña del añu pasáu.
Nesta temporada, qu'acaba'l 28 d'ochobre, operarán de manera regular nueve compañíes, Iberia, Iberia-Express, Vueling, Volotea, easyJet, Air Europa, Tap, Air Nostrum y Evelop.

Estes compañíaes ufiertarán 20 destinos, 14 d'ellos nacionales y seis internacionales, lo que supón la mayor ufierta de vuelos internacionales na historia de la infraestructura aeroportuaria asturiana, informa l'aeropuertu.

Pa l'asociación d'operadores y axencies de viaxes d'Asturies la d'esti añu ye, ensin dulda, la meyor ufierta de vuelos de tola historia del aeropuertu asturianu.

Los veceros tán aceptando esa ufierta, como lo amuesen los dos vuelos chárter entamaos pa Selmana Santa a Roma y Budapest. Tán prácticamente enllenos anguaño y el previstu pa xunetu a Moscú, yá ta enllenu dende va díes.

Los operadores y axencies de viaxes noten que la xente vuelve a viaxar y vuelven a repuntar los viaxes organizaos.