El bancu de lleche materno del HUCA yá pasteurizó 11 llitros de 35 donantes

Los responsables esperen poder rexistrar donantes de tol Principáu enantes d'un añu

El bancu de lleche materno del HUCA yá pasteurizó 11 llitros de 35 donantes y cuatro bebés yá se beneficiaron d'esta lleche. Un alimentu únicu, cargáu de proteínes y defenses pa ñácaros prematuros, una lleche que caduca a los tres meses.

Los responsables d'esti serviciu de Neonatoloxía esperen poder rexistrar donantes de tol Principáu enantes d'un añu, articulando recoyíes n'otros hospitales. El bancu controla la trazabilidá de la lleche y la idoneidá de les donantes al traviés d'una entrevista y una analítica.

Hasta agora la mayoría de les donantes viven na contorna d'Uviéu. Anguaño 33 madres siguen n'activo. Son cuasi la metá de les donantes ideales p'atender la demanda añal, unos 80 neños que nacen enantes de lo esperao y deseao.