L'iviernu en que nun paró de nevar

Nel añu 1888 hebo cuatro temporales con tráxiques consecuencies

El de 1888 foi l'iviernu que nun paró de nevar, un auténticu desastre socionatural. Les cróniques de la dómina falen de mediu centenar de muertos y 19.000 animales domésticos sepultaos pola nieve, namás n'Asturies.

Un estudiu sobre esti fenómenu centrará'l llunes n'Uviéu una nueva edición del eventu 'Pint of Science', una forma d'averar la ciencia al públicu en xeneral.

La xeógrafa Cristina García-Hernández falará de les repercusiones de les socesives grandes nevaes qu'afectaron a toles fasteres de monte d'Asturies con tráxiques consecuencies.

Fueron cuatro temporales encadenaos con espesores d'hasta 9 metros y un aisllamientu total. Cuenten les cróniques que namás en Cabrales fundieron 250 cases. Amás hebo ádanes de graves efectos, unu en Payares dexó nueve muertos.

García-Hernández pescudó fondos históricos y nos propios pueblos, tou un fenómenu estraordinariu dignu d'estudiu, 'l'iviernu en que nun paró de nevar'.