El texu de Samartín d'Ondes recupera tupíu, color y volume

Palideció delles décades pol cementu qu’afogaba los sos raigones

La insistencia de los poco más de 15 vecinos del pueblu de Samartín d'Ondes foi quien a recuperar unu de los sos elementos más queríos, un texu con dellos sieglos de vida que palideció delles décades pol cementu qu’afogaba los sos raigones.

L’actuación del Ayuntamientu dexó dar vida al exemplar, de más de 13 metros d’altor.

La cimentación de la contornada de la ilesia, va más de 30 años, provocó’l progresivu afogamientu del exemplar, con dellos sieglos de vida y convertíu en tou un símbolu pa esti pueblu.

Güei, la recuperación del texu ye más qu’evidente, ganando en tupíu, color y volume. Un premiu al enfotu del mediu rural por caltener la so ayalga más preciada, la natura.