Emprendedores qu’alcontraron la so propia fórmula pa conciliar

N’Asturies hai un total de 30.500 autónomes

El númberu de muyeres autónomes baxó un 10% n’Asturies dende qu’entamó la crisis. Ye un datu negativu que contrasta col nacional. Güei n’España hai un 2,2% más de muyeres trabayadores por cuenta propia qu’en 2008.

L’Asociación de Trabayadores Autónomos, ATA, atribúi la mala cifra d’Asturies a la falta de relevu xeneracional nel sector primariu, nel qu’hai munches autónomes, muyeres titulares d’esplotaciones agrícoles y ganaderes que se fueron xubilando.

El sector del comerciu tamién perdió munchu músculu nestos años, ye la rama d’actividá con más presencia femenina xunto cola agrícola-ganadera.

Güei hai n’Asturies un total de 30.500 autónomes, un 41% del total de trabayadores por cuenta propia de la rexón. TPA Noticies pon la llupa en tres emprendedores que tamién son madres y alcontraron la so propia fórmula pa conciliar vida llaboral y familiar.

La entrada a la tienda de moda infantil 'New Baby' ye toa una declaración d’intenciones. La so propietaria, madre de dos neños pequeños, desmarcóse de los tradicionales horarios comerciales pa conciliar poro, abre de 10:30 a 18:30 hores.

Noelia Sánchez tamién ye madre y la so propia xefa, poro, axusta l’horariu comercial de la so llibrería-xuguetería, 'La luna lee', p’atender a los sos fíos na midida de lo posible.

A Mercedes González, propietaria de 'Mamamífera', un comerciu especializáu en portabebés, ye normal vela despachar pegada al so fíu.

Elles son tres empresaries y madres qu’alcontraron, nel difícil sector del comerciu, el so mou de compaxinar trabayu y crianza.