Entra en serviciu’l tramu La Doriga-Curniana, pendiente d'acabar dende 2007

Cunta con una circulación media d’ente 4.000 y 8.000 vehículos caldía

El ministru de Fomentu, Íñigo de la Serna, y el presidente del Principáu, Javier Fernández, inauguraron güei’l tramu La Doriga-Curniana de l’autovía A-63, un trazáu de 2,3 kilómetros que s’entamó a construyir va 10 años y quedare paralizáu nel añu 2010.

La puesta en serviciu d’esti tramu, que supunxo una inversión de 42,8 millones d’euros, da continuidá asina a l’autovía proyectada la pasada década ente Uviéu y La Espina pa dar serviciu a la fastera suroccidental asturiana.

Los 2.300 metros de La Doriga-Curniana, que cunta con una circulación media d’ente 4.000 y 8.000 vehículos caldía, tien como estructura singular un viaductu de 875 metros de llargu encontáu por seis pilastres de 175 metros d’altu pa salvar el calce del Ríu Narcea.

El siguiente tramu, de seis kilómetros, ente Curniana y Salas ta nun grau d’execución del 38 por cientu, y, como l’inauguráu güei tamién sufrirá un cambéu por mor de la esistencia de grandes desmontes anque la intención del Ministeriu ye volver a entamar les obras nos meses vinientes.

Dempués de la puesta en serviciu de la carretera, De la Serna foi a Uviéu onde esti mediudía presentará, en presencia de representantes de los gobiernos d’Asturies y de Castiella Lleón, el diseñu fechu pol so departamentu pa la llinia d’alta velocidá ferroviaria ente La Robla (Lleón) y L.lena.

Esti trazáu inxerta’l pasu pela Variante de Payares, dos túneles d’unos 25 kilómetros de llargu que crucen el cordal cantábricu y que supunxeron una inversión d’unos 3.600 millones d’euros, y que’l so diseñu sufrió dellos cambeos del Ministeriu de Fomentu nos últimos años.

En marzu, Fomentu dio anuncia -atendiendo les esixencies del únicu diputáu de Foro p’aprobar los presupuestos de 2017- de qu’equiparía dambos túneles con anchu de vía internacional pa la so puesta en serviciu de forma simultánea, unes obres que s’allargaríen hasta 2020, lo que camudaba la previsión de mano d’utilizar anchu ibéricu pa garantizar el pasu de mercancíes.

Sicasí, el Ministeriu desveló agora qu’equipará unu de los túneles col denomáu 'tercer filu' pa permitir el pasu de convoyes de mercancíes dende la so puesta en serviciu tal y como esixía’l Gobiernu asturianu.