Espertos dan les claves pa salvar de la estinción al gallu montés cantábricu

Consideren fundamental ameyorar les técniques de la cría en cautividá

A les categoríes pa la fauna de vulnerabilidá y de peligru, dende l'añu 2015, xúntase la de situación crítica onde s'inclúi'l gallu montés cantábricu. Conséñalo la urxencia p'actuar y l'interés xeneral nos proyectos.

Nuna xornada sobre la xestión de la especie, celebrada en Rusecu (Sobrescobiu), los espertos afiten que ye necesario actualizar el censu porque'l postreru señala que namás hai 35 machos na nuesa rexón, cifra que podría menguar entá más. Amás, sorrayen, ye necesario amenorgar la so mortalidá.

Aseguren, amás, qu'ameyorando les técniques de la cría en cautividá salvaríase la especie, daqué que se demuestra col programa de Wisla en Polonia.

En 15 años algamaron sacar alantre 1.430 exemplares. Pero nun resulta fácil yá que se necesiten unes infraestructures especiales y unos protocolos de remanamientu mui particulares al tratase d'aves xabaces.

El refuerzu poblacional ye l'oxetivu final pero pa consiguilo fai falta la collaboración de les alministraciones.