Fernando Lastra, nuevu conseyeru d'Infraestructures, Ordenación del Territoriu y Mediu Ambiente

Belén Fernández dexa la conseyería por motivos personales

Fernando Lastra sustitúi a Belén Fernández al frente de la Conseyería d'Infraestructures, Ordenación del Territoriu y Mediu Ambiente.

Belén Fernández treslladó al presidente del Principáu, Javier Fernández, el so deséu de dexar la so responsabilidá al frente de la conseyería por motivos personales y de reincorporase al so puestu de funcionaria na Alministración autonómica.

El xefe del Executivu asturianu agradeció-y la so intensa dedicación y el bon trabayu fechu nos últimos años nun departamentu de gran dificultá por mor del gran volume d'asuntos que xestiona.

La conseyera contribuyó especialmente a impulsar la ordenación del territoriu y, en concreto, la fastera metropolitana central d'Asturies.

Tamién centró los sos esfuercios na meyora de la calidá del aire y na defensa de la modernización de les comunicaciones de la comunidá.

Tanto'l cese de Belén Fernández como'l nomamientu del nuevu conseyeru sedrán asoleyaos mañana nel Boletín Oficial del Principáu d'Asturies (BOPA) y la toma de posesión de Fernando Lastra sedrá la selmana viniente.