Fomentu da anuncia pa esti añu un plan pa la barrera ferroviaria d'Avilés

Íñigo de la Serna tuvo güei una xunta de trabayu nel Ayuntamientu d'Avilés

El ministru de Fomentu, Íñigo de la Serna, dio anuncia güei n'Avilés de la creación d'un grupu de trabayu cola participación de les tres alministraciones públiques cola fin de que, enantes de qu'acabe l'añu, haya una propuesta consensuada, con un estudiu de diseñu, pal plan pa la eliminación de la barrera ferroviaria nel so tramu urbanu.

"Dende ehí, si somos quien a facelu, y soi optimista al respective, los dos pasos siguientes que se podríen entamar, cuasi de forma paralela, sedrán la ellaboración d'un conveniu de desendolcu del plan, coles condiciones de financiación que se consideren afayadices, y en segundu llugar la ellaboración del correspondiente estudiu informativu", esplicó'l ministru.

Íñigo de la Serna tuvo güei una xunta de trabayu nel Ayuntamientu d'Avilés cola alcaldesa de la ciudá, Mariví Monteserín, y el conseyeru d'Infraestructures, Fernando Lastra, pa falar d'esti y otros proyectos pendientes pal conceyu.

El Ministeriu sedrá l'encargáu de perfilar l'estudiu pal plan de les víes del tren enantes de qu'acabe l'añu, teniendo en cuenta la propuesta fecha de mano pol Ayuntamientu.

La propuesta municipal, que contempla'l soterramientu d'un tramu de les víes del tren, ta siendo analizada y estudiada polos técnicos del Ministeriu.

De la Serna abrió la puerta a posibles modificaciones "y llendes de calter técnicu tanto no que cinca a la propia estación de La Maruca como lo que tien que ver col problema técnicu de resolver la integración colos servicios afectaos, sobre manera del saneamientu".

Na que ye la so quinta visita a Asturies dende que ye ministru de Fomentu, Íñigo de la Serna robló un conveniu de cesión de dos tramos de carretera que dexará desbloquear les nueves entraes pal Parque Empresarial Principáu d'Asturies (PEPA).

La decisión fadráse efectiva nuna xunta viniente del Conseyu de Ministros al traviés d'un Real Decretu, que dexará llicitar y volver a entamar los trabayos de construcción de los viales.

Íñigo de la Serna tamién faló de la construcción de nueves entraes al puertu d'Avilés, la denominada Ronda Norte, pa la que se plantea una nueva alternativa "pa que l'impactu y el beneficiu funcional seya'l más positivu pal puertu pero tamién pa la ciudá".

"Toos somos conscientes de les torgues del proyectu dende'l puntu de vista técnicu, social y funcional, pol impactu o, quiciabes, refugu, que se pue producir en dalgún conceyu",señaló'l ministru.

De la Serna destacó la relevancia d'esti vial "como una infraestructura esencial pa meyorar la competitividá del puertu" pero indicó que tamién tendrá que tener en cuenta la política de movilidá urbana del conceyu".

Poro, acordóse que'l Principáu aporte una solución "en pocos díes" que meyore la funcionalidá del vial "y contribuya a una meyor integración del tráficu municipal y de la contornada urbana y una accesibilidá mayor".

Fernando Lastra, per parte de so, indicó que'l compromisu ye contemplar otres posibles opciones, "una combinación de les qu'hai o inclusive dalguna nueva" pa les nueves entraes del puertu.

Dende ehí, el titular de la Conseyería d'Infraestructures amosó la so disposición a facer un nuevu protocolu que sustituya al d'enantes, col compromisu de les tres partes implicaes pa llevalu alantre "con munchísima rapidez".

Los representantes de les tres alministraciones destacaron la "estraordinaria disposición" p'avanzar nos principales proyectos pa la ciudá, como, principalmente, el plan de les víes y les nueves entraes al PEPA y al puertu.