La lluvia cai con fuerza en Xixón

Inundaciones, accesos anegaos y bandera colorada en San Llorienzo

Xixón foi la ciudá na que más llovió de toa España con 54,4 llitros per metru cuadráu.

Una de les zones más afectaes pola lluvia foi la Escuela Politécnica. L'agua llegó a los llaboratorios y a nada tuvo de llegar a tolos ordenadores d'esa escuela provocando una llaceria.

Yá nun hai clases, pero los alumnos y profesores que fueron al centru a revisar esámenes atoparon l'edificiu inundáu y ensin lluz.

Agora trabáyase n'evaluar los daños pa dar parte al seguru, anque aseguren que les pérdides son importantes, y non solo económiques.

La dirección conseña que los esámenes qu'entamarán el miércoles van facese, anque ye posible que se tengan que facer n'otru edificiu. Fadránlo ensin cafetería yá qu'ésta tamién quedó inundada dafechu y nun abrirá les puertes yá hasta setiembre.

Tamién se vieron afectaes les instalaciones del Grupo de Cultura Covadonga pol desbordamientu del regueru del Molín. La parte más afectada fueron les oficines xenerales y el pabellón de tenis. Nel centru yá volvieron a la normalidá anque dos de les pistes siguen cerraes.

Tamién hebo consecuencies na zona rural de Xixón onde hai rexistraos 18 argayos y tres caminos cortaos, cola vista puesta nun árbol que corta la carretera que xunta Santurio y Vega.

Amás hai munches zones inundaes. En Porceyo, polo menos dos cases tán aisllaes poles inundaciones dende esta nueche. Nuna d'elles vive una familia con un bebé d'un mes. Los vecinos de la zona tán faciendo balance de los daños que sufrieron na nueche.

La bandera colorada vuelve a San Llorienzo

Per otra parte, l'apaición esta mañana d'una nueva mancha marrón obligó al Ayuntamientu a allugar güei otra vuelta la bandera colorada que prohíbe'l bañu tres quitala ayeri depués de qu'un episodiu asemeyáu obligara a tomar esa midida los pasaos vienres y sábadu.

Moriyón comentó que la midida que'l Conceyu aplicará cuando haya esti tipu de situaciones sedrá allugar la bandera colorada 48 hores, tiempu que tarden en morrer les bacteries.

L'alcaldesa esplicó que, por mor d'estos temporales, los alliviaderos funcionen de manera correcta y lo "intolerable" y que s'allugaría "fuera de la llei" ye que lo ficieren en "époques seques".