La playa San Llorienzo sigue zarrada al bañu

Lastra confía en que los problemes de la sablera seyan "accidentales"

La playa de San Llorienzo sigue güei zarrada al bañu anque la mancha marrón qu’ayeri la cubría dafechu va desapaeciendo.

Esta mañana aconceyó la comisión de siguimientu d’esti episodiu que ta bien rellacionáu cola lluvia fuerte que cayó na ciudá y les torgues nel tratamientu del agua cuando esto pasa.

Una mancha que güei llegó yá a la playa de Xibares (Carreño). Dende la sablera, dende la urbanización de Xibares y inclusive dende’l parque de carbones d’Aboño pue vese un gran parche de color pardo.

El conseyeru d’Infraestructures, Ordenación del Territoriu y Mediu Ambiente, Fernando Lastra, confió en que los problemes de contaminación de la playa seyan "episodios accidentales" y que nun seyan un "problema medioambiental", al empar qu’insistió en que l’espediente informativu abiertu ye daqué "normal" que nun tien que crear alarmismu.

El titular de Mediu Ambiente solliñó que’l Principáu ta trabayando "seria y rigurosamente" cola fin de tener "una garantía dafechu" de que l’agua ta en bones condiciones, porque lo que se ta xugando ye "el prestixu de la playa".

Nesti sen, dio anuncia de que se punxo en contactu col Gobiernu central pa tresllada-y "esti y otros problemes de la rexón", que deben ser abordaos darréu.

No que cinca al orixe del problema, nun quixo entrar en detalles pa "nun amestar un problema mayor", anque apuntó que la cantidá d’agua que cayó nel Principáu’l fin de selmana, cuando cayeron "cuasi 60 llitros per metru cuadráu", yera daqué que "nun se podía prever".

Dende’l PP, el voceru del grupu municipal de Xixón, Pablo González, adelantó que’l Conseyu de Ministros d’esti vienres prevé aprobar el fin del procesu de construcción de la depuradora del este que dexará desbloquear la instalación y entamar los trabayos de desarenáu y desengrasáu del agua.

Per parte de so, el grupu municipal de Ciudadanos afirmó que’l gobiernu local "debería asumir responsabilidaes" si’l Principáu abre un espediente sancionador al consistoriu poles manches apaecíes en La playa de San Llorienzo.