Un total de 2.000 profesionales espardíos nuna trentena d’empreses dedíquense a la seguridá privada n’Asturies.
Denuncien que l’intrusismu y la competencia deslleal sigue siendo’l mal endémicu del sector. Sobre manera, nes zones d’ociu, onde los porteros y la vixilancia, solliñen, nun dependen d’empreses de seguridá y deberíen tar a xuiciu de so regulaos pola llei.
Nesi sen, aplauden la nueva llei de contratos públicos y agradecen que’l Principáu yá se punxere en contactu con ellos pa tratar les nueves condiciones de contratación na seguridá privada.
L’oxetivu ye evitar que participen empreses pirates que nun tán en condiciones, dicen, de llevar alantre grandes paquetes de contratación.
La seguridá privada cuntó güei col sofitu de les fuercies de seguridá. Celebraron delles ponencies nes que s’abordó la collaboración en materia de terrorismu yihadista en fasteres urbanes y la seguridá nos campos de fútbol.
Neses xornaes la Guardia Civil anticipaba que tien intención de medrar la vixilancia nel Descensu del Seya y nel Xiringüelu. Ye parte del dispositivu especial que tán preparando pal branu, dientro del plan de seguridá pa evitar atentaos yihadistes en fasteres urbanes.
Sobre la seguridá nel fútbol pronuncióse güei’l Coordinador Policial de Seguridá nel Deporte, José Manuel Fernández.
Asegura que n’Asturies nun hai grupos sobre manera conflictivos y avanza que la Policía yá ta trabayando nun plan de seguridá por si l’Uviéu y el Sporting coinciden na fase d’ascensu a primera división.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL