La xata asturiana nun para de medrar

En 2017 el volume de certificación de xata asitióse en 23.642 xatos

El volume de xatos asturianos certificaos medró un 1% en 2017, un "bon" añu que tuvo marcáu pola escasez d’exemplares que completaron el so ciclu productivu n’Asturies por mor del gran volume d’esportación d’animal vivu, sobre manera, a países árabes.

Asina, en 2017 el volume de certificación de xata asturiana asitióse en 23.642 xatos, lo que supunxo 6,5 millones de kilos de carne, según esplicaron en rueda de prensa la conseyera de Desendolcu Rural, María Jesús Álvarez; el presidente de la Denominaciónd’Orixe Indicación Xeográfica Protexida (IXP) Xata Asturiana, Rubén Fernández, y la so directora xerente, Elena Cebada.

Álvarez afirmó que 2017 foi "un bon añu" pa Xata Asturiana, que "consolida la medría continuada de la marca" y vende’l 28 por cientu de la so producción n’otres comunidaes autónomes, sobre manera en Madrid, Castiella Lleón y Baleares.

En 2017 el valor comercial de la carne certificao medró a más de 29,9 millones d’euros, el trabayu al rodiu de la marca superó les 10.000 persones y Xata Asturiana foi una de les cuatro marques de calidá d’España que más facturaron y la segunda marca de vacunu más comercializada nel país.

L’añu pasáu consolidó una "medría caltenida de la marca", qu’entamó va 15 años, con 4.162 ganaderíes (agora hay 5.721) y poco más de 12.000 canales, mientres enagora hai 23.642, lo que supón una medría del 113%

En 2017 punxéronse en marcha 244 nueves esplotaciones, una nueva sala de despiece y siete carniceríes colo que "los datos verifiquen cinco años de medría de siguío", señaló Álvarez, que resaltó que la producción de xata ecolóxica medró un siete por cientu certificando 431.152 kilos.

La conseyera destacó que yá forma parte de la IXP Xata d’Asturies el 75% del vacunu potencialmente certificable y que la capacidá de producción de ganaderos d’IXP medró abondo de mou qu’en quince años amestáronse a la marca 1.500 profesionales.

Asina, la cifra pasó de cuasi 4.200 a daqué más 5.700 esplotaciones lo que supón una medría del 37,4% de esplotaciones que permitió más que duplicar la producción en quince años.

Álvarez indicó que l’Executivu autonómicu sofita la Xata Asturiana y señaló que’l presupuestu prorrogáu destina 400.000 euros a la promoción, certificación y control de calidá y que siguirá aportando les canales de comercialización y tarán presentes en cites como Madrid Fusión o’l Salón del Gourmet.

Per parte de so, el presidente de la Denominación d’Orixe Xata Asturiana afirmó que 2017 tuvo marcáu "polos riesgos del mercáu esterior" cola escasez de xatos, pero sicasí amestáronse 244 esplotaciones, un cuatro por cientu más qu’en 2016.

Amás, dixo que la producción controlada y certificada de la carne de races bovines autóctones sigue medrando con una medría en producción y ventes pola venta de xatos vivos que nun acabaron el so ciclu dientro de la comunidá pola demanda esterior que ta sacando xatos a otres comunidaes y a los países árabes.

La IXP yá axunta 5.721 esplotaciones ganaderes, con 84.517 madres, lo que supón una medría del potencial productivu del 3,5% al respective sel añu anterior, dixo Fernández, y ficiéronse más de mil controles y auditoríes a inscritos, tomáronse más de 24.000 muestres pal control de la trazabilidá.

Fernández afirmó que de cara a 2018 quieren impulsar la marca de calidá de vacunu mayor, con productu dende 18 meses, y como problema a salvar, apuntó al intentu por que nun colen tantos xatos de la comunidá, una de les razones poles que la medría d’exemplares certificaos nun foi tan grande como n’años enantes, cuando la xuba foi del 10%.