Les inundaciones paralicen la planta d’ArcelorMittal n’Avilés

L’agua entra nes instalaciones pol desbordamientu del regueru Les Llongues

El desbordamientu del regueru de Las Llongas inundó les instalaciones de l’acería d’ArcelorMittal n’Avilés y obligó a parar la producción.

Pela mañana l’agua foi baxando, según confirmen fontes de la multinacional, anque la multinacional desconoz, enagora, cuálos son los daños y cuándo podrá retomase la producción.

La empresa decidió mandar pa casa al personal de l’acería dos díes que s’aprovecharán pa facer reconocimientos médicos y cursos de formación. Namái n’última instancia recurriríase a un espediente temporal de trabayu.

La interrupción de l’actividá na acería avilesina tamién obligó a parar el fornu altu A que suministra l’arrabiu pa esta instalación.

Na factoría xixonesa tamién hebo inundaciones puntuales n’otros talleres, anque menos significatives que la sufrida en Tabaza. Sigue cortada la rotonda d’entrada per Veriña y namái pue llegase a la fábrica pela entrada de Sotiello.

N’otra multinacional, Alcoa, los trabayadores pidieron una xunta urxente cola dirección pa que se pongan en marcha midíes qu’eviten lo que pasó en xunu de 2010.

Va agora ocho años, unes lluvies como les d’esti fin de selmana, inundaron la subestación lléctrica de la factoría avilesina que tuvo parada tres meses.

Los trabayadores aseguraen qu’ayeri pela nueche tuvieron al límite, con abundancia d’agua nes cais y dalgunes zones de la fábrica, pero ensin llegar a interrumpir la producción.