UXT denuncia qu'Asturies tien la segunda brecha salarial más grande d'España

Les muyeres asturianes cobren un 28'6% menos que los homes

La brecha salarial ente homes y muyeres n'Asturies ye de 28,6%, la segunda más alta d'España. Son datos actualizaos a mes de xunu y que güei presentó UXT Asturies.

En diez años la diferencia salarial n'España menguó malapenes un 2,7 por cientu, una meyora lenta y escasa n'opinión d'UXT Asturies, qu'asegura que n'España fadríen falta 47.000 millones d'euros añales p'acabar coles diferencies.

UXT demanda una llei d'igualdá salarial y el cumplimientu de la normativa yá existente, aseguren que l'inxerimientu dafechu de la muyer apurriría tres millones d'euros al PIB de la Xunión Europea y alvierten de los datos d'emplegu ente les muyeres n'Asturies.

De la situación de la muyer nel mercáu llaboral afondará UXT na so escuela de branu a entamos de setiembre nunes xornaes col títulu 'Más allá de la llei d'igualdá'.

A nivel global, de siguir a esti ritmu d'anguaño, les muyeres tardaríen 170 años n'igualase a los homes.