Una "cita a ciegues" colos llibros n'As Figueiras

La biblioteca del llugar busca axuntar amor y llectura

Nesti día de San Valentín, n'As Figueiras pensaron qu'una bona forma de celebralo pue ser axuntando amor con llectura. La biblioteca del llugar danos la oportunidá d'una "cita a ciegues" con llibros.

Pue elixise ente tolos llibros que tean completamente envueltos y, poro, el so títulu ye un secretu, tamién el so argumentu. Eso sí, aprovechando que tamos nel día l'amor, pue imaxinase la temática.

Esta iniciativa nació va yá dalgunos años nuna biblioteca de Los Ángeles y llega a As Figueiras con munchu éxitu. Del mediu centenar de llibros destinaos a la xera, más de la metá yá volaron.

Nesta biblioteca centenaria, onde los más pequeños siempre tienen un papel perimportante, decidieron qu'esta romántica iniciativa se caltenga tol mes de febreru.