Asturies, tercer comunidá que peor saldu vexetativu rexistró en 2017

Contabilizó 13.153 fallecimientos y namás 6.013 nacimientos

Asturies contabilizó'l pasáu añu 13.153 fallecimientos, más del doble que los 6.013 nacimientos rexistraos, colo que s'anotó'l tercer peor saldu vexetativu del país, namás per delantre de Galicia y Castiella y Lleón, según los datos provisionales asoleyaos güei pol Institutu Nacional d'Estadística (INE).

Ye'l tercer añu consecutivu nel que'l Principáu rexistra más del doble de fallecimientos que de nacimientos.

El Principáu foi la única comunidá autónoma na que baxó'l númberu de fallecimientos en rellación a 2016, un 0,4 por cientu, pero caltuvo la mayor tasa bruta de mortalidá (muertes por cada mil habitantes) del país, 12,8, frente al promediu nacional de 9,1.

Amás, Asturies amenorgó'l númberu de nacimientos un 5,3 por cientu y rexistró la menor tasa bruta de natalidá (nacimientos por cada mil habitantes), 5,83, frente a la media nacional de 8,37.

Con ello, tamién rexistró'l númberu mediu de fíos por muyer más baxu d'España, 1,03, frente a la media de 1,31.

Con estos datos, el saldu vexetativu de la rexón (diferencia ente muertes y nacimientos) foi negativu en 7.140 persones, un datu superáu solamente por Galicia (-13.522) y Castiella y Lleón (-13.446).

La estadística del INE tamién cifra la esperanza de vida de los asturianos na nacencia en 82,5 años, la sesta más baxa ente les comunidaes autónomes y llixeramente per debaxo de la media del país de 83,1. Nel casu de les muyeres xubió a 85,5, mientres que nel de los homes baxa a 79,4.

Amás, revela que'l númberu de matrimonios na rexón amenorgó'l pasáu añu nun 2,5 por cientu, hasta 3.633.

D'esi total, 2.797 fueron matrimonios civiles, mientres que 828 fueron católicos y otros 8 celebráronse d'alcuerdu a otres relixones.

Coles mesmes, en 378 d'esos matrimonios polo menos una de les persones yera estranxera.

Nel conxuntu del país rexistráronse en 2017 un total de 391.930 nacimientos, el númberu más baxu dende 1996, mientres que la tasa de natalidá asitióse en 8,4 nacimientos por cada mil habitantes y ye la más amenorgada de tola serie histórica, que se remonta a 1976.

Los datos del INE ponen de manifiestu, coles mesmes, la perda de población rexistrada n'España l'añu pasáu con un saldu vexetativu negativu (la diferencia ente nacimientos y muertes) de 31.245 persones.

Según datos provisionales, l'añu pasáu nacieron n'España 391.930 neños, lo que supón un descensu del 4,5 % respecto al añu anterior (18.653 nacimientos menos) y, dende 2008, añu en que nacieron 519.779 neños y que foi'l máximu en 30 años, el númberu de nacimientos amenorgóse un 24,6 %.

Pela so parte, en 2017 finaron n'España 423.643 persones, un 3,2 % más que nel añu anterior, y la tasa de mortalidá asitióse en 9,1 fallecimientos por cada mil habitantes, frente a 8,8 del añu 2016.

Esto implica qu'en 2017 el país perdió población, en concreto 31.245 persones (la diferencia ente nacimientos de madre residente n'España y fallecimientos de residentes nel país), daqué qu'asocedió per primer vegada en 2015, cuando se rexistró un saldu negativu de 1.976 persones.