Los 'All Blacks', Premiu Princesa d'Asturies de los Deportes

"Exemplu d'integración racial y cultural"

La selección masculina de rugby de Nueva Zelanda, conocida como los 'All Blacks', foi premiada güei col Premiu Princesa d'Asturies de los Deportes 2017, un galardón al qu'optaben venticuatro candidatures d'once nacionalidaes, que recibe por ser un "iconu" y un "exemplu d'integración racial y cultural".

Los 'All Blacks', allugaos nel primer llugar del ránking internacional del rugby, son una lleenda nesti deporte nel ámbitu mundial y en Nueva Zelanda, onde ye un deporte nacional.

Ye un iconu d'esti deporte en tol mundu, la selección neozelandesa tamién ta considerada exemplu d'integración racial y cultural, que tresmite valores d'unidá, amistá, solidaridá y deportividá.

El xuráu, presidíu por Abel Antón, escoyó ganadora la candidatura propuesta pol embaxador d'España en Nueva Zelanda, Manuel Pradas Romaní, y el director de Casa Asia, Ramón Moreno, y que foi sofitada por Andrew Jenks, embaxador de Nueva Zelanda n'España.

La selección masculina de rugby de Nueva Zelanda, onde esta disciplina ye'l deporte nacional, ye la más representativa de los diez equipos de distintes categoríes que la Federación de Rugby d'esti país tien en competiciones internacionales.

Creada en 1893, la selección disputó'l so primer partíu internacional en 1903 escontra Australia en Sídney y, en 1905, fizo una xira peles Islles Britániques.

Anguaño ye campeona del Mundu, pero Nueva Zelanda ye'l conxuntu nacional más premiáu de la historia d'esti deporte al contar nel so palmarés con tres títulos (1987, 2011 y 2015) de los ocho Mundiales celebraos hasta la fecha, siendo l'únicu equipu que repite títulu mundial consecutivu y que tien récord de victories frente al restu de selecciones nacionales.

Dende'l so debut internacional de 1903, namás Australia, Inglaterra, Francia, Sudáfrica y Gales ganaron a Nueva Zelanda en partíu oficial.

Con un porcentaxe de trunfos del 76%, la selección neozelandesa ta ente los equipos más exitosos de cualquier deporte.

Desque la Federación Internacional, anguaño World Rugby, creó en 2003 la clasificación mundial, Nueva Zelanda, que ta anguaño nel primer puestu, foi primera nesta llista en más del 80% del tiempu. En 2014 afitó un fitu al liderar el ránking cinco años siguíos.

De les 21 ediciones d'esti tornéu, Nueva Zelanda ganó en catorce ocasiones, con unes estadístiques mui superiores a les de los sos rivales.

Amás, algamó un Grand Slam -cuando una selección del hemisferiu sur gana nuna xira a Inglaterra, Irlanda, Escocia y Gales- en cuatro ocasiones (1978, 2005, 2008 y 2010).

Dende los entamos del rugby en Nueva Zelanda, esti deporte ta venceyáu a la haka -danza tribal maorí de desafíu-, que ye interpretada polos xugadores sobre'l terrén de xuegu enntes del entamu de cada partíu internacional.

Na edición del pasáu añu, el Premiu Princesa d'Asturies de los Deportes recayó nel triatleta Javier Gómez Noya, plata olímpica en Londres 2012 y únicu quíntuple campeón mundial de tola historia, pol so "gran palmarés y los sos valores d'esfuerzu y enfotu".

Enantes fueron distinguíos, ente otros, los hermanos y xugadores de baloncesto Pau y Marc Gasol, el Maratón de Nueva York; José María Olazábal; Iker Casillas y Xavi Hernández; Haile Gebrselassie; la Selección española de fútbol; Yelena Isinbayeva; Rafa Nadal; Michael Schumacher o la Selección española de baloncestu.

Esti ye'l cuartu de los ocho Premios Princesa d'Asturies que se dan esti añu, en que cumplen el so trentenu séptimu añu.

Enantes fueron daos el Premio Princesa d'Asturies de les Artes al artista sudafricanu William Kentridge, el de Comunicación y Humanidaes al grupu musical y humorísticu Les Luthiers y el de Cooperación Internacional a la Hispanic Society of America.

El Premiu ta dotáu con reproducción d'una escultura de Joan Miró -símbolu representativu del galardón-, la cantidá en metálico de 50.000 euros, un diploma y una insignia.