L'autobús de 'HazteOír' nun ye quien a llegar a Uviéu tres ser apredreáu

Un grupu d'encapuchaos llanzó piedres escontra l'autobús

L'autobús de l'asociación 'HazteOír' nun foi quien a circular güei peles cais d'Uviéu tres sufrir la rotura de delles llunes al apedrealu un grupu d'encapuchaos nuna gasolinera de La Pola (L.lena), namás entrar n'Asturies.

El colectivu, con un autobús pintáu col lema "Dexái a los neños en paz", convocare de mano a los medios de comunicación nuna estación de serviciu de Siero pa camudar darréu'l llugar d'alcuentru pola gasolinera de L.lena onde tuvo llugar l'ataque.

A la so llegada a la estación de serviciu, un pequeñu grupu de persones que llevaben una bandera arcoiris, ente los que taben el secretariu xeneral de Podemos Asturies, Daniel Ripa, increparon a los miembros de 'HazteOír' ente glayíos de "caradures", "fascistes" y "nun tenéis respetu".

Cuando los integrantes del colectivu tornaben al vehículu, un grupu d'encapuchaos entamaron a llanzar piedres escontra l'autobús que causaron la rotura de delles llunes lo que nun lu dexó siguir circulando, según un portavoz de 'HazteOír'.

Al empar delles decenes de persones concentrárense na plaza del Ayuntamientu d'Uviéu pa protestar pola visita del autobús y desplazáronse dempués hasta la sede del rexistru municipal, asitada a pocos metros, a la que fueron los representantes de 'HazteOir' pa entregar un manifiestu.

Ente glayíos de "fuera, fuera" y de "faches de mierda" de los congregaos, el voceru de l'asociación, Miguel Vidal, entró nes dependencies del Ayuntamientu d'Uviéu pa entregar una copia del manifiestu fechu pola so organización nel que piden que se respeten los derechos de los neños nel ámbitu educativu.

Según Vidal, qu'aseguró refugar "tou tipu de violencia", l'oxetivu de la so organización ye que les lleis d'educación afectivo-sexual que yá aprobaron once comunidaes autónomes "nun seyan obligatories" y que nesi ámbitu "nun decidan los gobiernos sinón les families".