El reconocimientu oficial del asturianu moviliza a miles de persones n'Uviéu

¡Agora! ye'l lema que percorrió les cais de la ciudá

El PSOE, per primer vez, xunto a otros partíos, como Podemos y IX, y a numberoses asociaciones sociales, culturales, sindicales, deportives, profesionales y vecinales, participó güei nuna manifestación convocada n'Uviéu pola Xunta pola Defensa de la Llingua Asturiana pa reivindicar la oficialidá del asturianu nel Principáu.

La de güei foi la manifestación más numberosa de les que se celebraron na capital asturiana dende hai más de dos décades, según los organizadores, que cifraron nunos 30.000 los asistentes a esti actu reivindicativu, mientres que la policía fízolo nunos 5.000.

Ente los asistentes taba la secretaria d'Organización de la Federación Socialista Asturiana, Gimena Llamedo, acompañada por otros miembros de la Executiva rexonal, como Roberto Morís o Mari Luz Pontón, que foi quien presentó la enmienda aprobada nel congresu del pasáu mes de setiembre nel que'l PSOE sumóse al carru de la oficialidá.

El secretariu xeneral de la FSA-PSOE, Adrián Barbón, nun asistió por tar nun actu de partíu en Llaviana, anque sofitó dende ellí la movilización en defensa del asturianu.

El coordinador rexonal d'IX, Ramón Agüelles y el voceru parllamentariu, Gaspar Llamazares; el secretario xeneral de Podemos, Daniel Ripa, y el voceru de la formación morada, Emilio León, ente otros políticos tamién ficieron el percorríu hasta la catedral, amás de dirixentes sindicales de CCOO, UXT, CSI

Baxo'l lema de "Agora ye'l momentu" y col son de fondu de dos bandes de gaites, un grupu de panderetes y una batucada, los manifestantes salieron de la estación del Norte pasaes les 12:00 hores y percorrieron la cai Uría hasta la plaza la catedral pa lleer un manifiestu a favor de la oficialidá de la llingua.

Enantes, Gimena Llamedo conseñara que'l momentu de la oficialidá sedrá la próxima llexislatura y que l'apuesta socialista pasará por sofitar un "modelu a l'asturiana, voluntariu y alloñáu d'imposiciones" polo que, por exemplu, nun s'obligará a los asturianos a falar n'asturianu.

Argüelles tamién ye partidariu d'una oficialidá "ensin nengún tipu d'agresión al castellanu y ensin imposiciones", mientres que Ripa calificó la movilización d'histórica y conseñó que nun se pue esperar más pa exixir respuestes polítiques en defensa de los derechos de la xente que fala asturianu.

Pela cueta, la presidenta del PP d'Asturies, Mercedes Fernández, dixo dende Candás que respetaba la manifestación, pero que'l so partíu ta escontra de la cooficialidá porque tien la sensación de que lo ta tamién "la inmensa mayoría" de la población y porque con esa declaración impondríense una serie de requisitos nel ámbitu educativu, empresarial, alministrativu o xudicial que nun consideren nin afayadizos nin convenientes.

El voceru de la Xunta pola Defensa de la Llingua, Xosé Candel, sicasí aseguró que l'apuesta pola oficialidá "cuenta con más sofitos que nunca, y col sofitu de la razón y la xusticia" polo que, al marxe de los tiempos que marque la Xunta Xeneral del Principáu p'abordar la oficialidá, "ye'l momentu de facer el cambiu".

Pa la Xunta pola Defensa de la Llingua esta manifestación foi especial y diferente a la d'años pasaos porque nesta ocasión les circunstancies polítiques permiten ver el futuru con más claridá pa les persones que falen asturianu y gallego-asturianu.

Al acabar la marcha, l'actriz María Cotiello lleó na plaza la catedral un manifiestu nel que, en clara referencia a los socialistes, la Xunta dio la "bienvenida a quien hasta agora nun nos acompañaron nesti camín y qu'entamen a facelo estos meses".

Esta organización amosóse tamién convencida de qu'a estes fuerces sumaránse otres nesti proyectu pola oficialidá porque "naide pue tar escontra de poner les bases llegales pa que les llingüess propies d'Asturies puean sobrevivir".

Na so opinión, agora tóca-yos a los políticos recoyer les demandes de la xente y reformar l'artículu cuatro del Estatutu d'Autonomía pa declarar la oficialidá del asturianu y qu'ésti tenga'l mesmu marcu xurídicu que'l restu de llingües del Estáu pa que nun se pierda.

Pa la Xunta, nun ye aceptable qu'haya ciudadanos de primera y de segunda en función de la llingua qu'usen o de la cantidá de xente que la use polo que ye preciso algamar la normalización llingüística.

"Nun ye ético y moralmente inaceptable que los derechos ciudadanos que nos asisten nun tean yá reconocíos por llei, pudiendo talo", destaca'l manifiestu, nel que s'asegura que "el reconocimientu d'estos derechos ye una demanda qu'añera nel corazón mesmu de l'Asturies democrática y plural".