Salir sola de casa yera, hasta va nueve meses, impensable pa Bene. Les últimes cuatro décades de los sos 75 años tuvieron marcaes pola enfermedá de Meniere, una patoloxía del oyíu mediu que-y provocaba biltos de vértigu incontrolables y que-y sobreveníen ensin avisu.
Esos episodios tiñazáronla hasta ablayala a pesar de delles medicaciones. Va un añu Bene sometióse a una intervención ambulatoria na que-y inyectaron antibióticos nel tímpanu. Tardó tres meses en recuperar l'equilibriu y la so vida.
Dos de cada 10 pacientes que pasen por consulta llogren controlar esos biltos con inyecciones intratimpániques que puen ser tamién con corticoides. Son los casos más rebeldes.
Too asocede nel oyíu mediu, onde s'agospia'l sistema d'equilibriu. Ye'l vestíbulu dende onde se distribúi al celebru tolos movimientos de la nuesa cabeza. Desconozse por qué nestos pacientes nun funciona.
Pocos saben qu'esa ye una dolencia que carez dende fai 30 años el xurista Bernardo Fernandez. Atribuyía les sos crisis al estrés y los viaxes. El so Meniere, col que convive, ye de manual. Siente un runfíu persistente y plenitú nel so oyíu derechu, al qu'acompañen voltures enantes d'acabar nuna crisis de vértigu.
Esos biltos recurrentes provocáben-y perda d'audición, pero non les ganes de trabayar. Dende va tres años tienlo controlao con inyecciones y antihistamínicos. Tres años de felicidá, diz, nos que recuperó inclusive'l preste de beber té.
Dellos espertos europeos axúntense esta tarde y mañana pa falar de les últimes meyores terapéutiques y de diagnósticu n'Uviéu.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL