La Escandalera vístese col arcu la vieya pa celebrar l'Arguyu LGTBI

Uviéu quier ser "una ciudá acoyedora"

La plaza de La Escandalera d'Uviéu tíñese colos colores del arcu la vieya p'acoyer los actos centrales colos que la ciudá celebra'l Día Internacional del Arguyu LGTBI col lema "Uviéu, ciudá con Arguyu".

En La Escandalera acabará'l pasucais que percorrerá'l centru d'Uviéu pa reivindicar el derechu de llesbianes, gais, transexuales, bisexuales y intersexuales. Amás d'establecer ehí un espaciu físicu pa escribir deseos y reivindicaciones, nel 'escenariu del Arguyu' fadránse tamién les actuaciones, ente otros, de Pedro Durán y 'Lady Llagar'; Dj's House of Play y Sor Rata, y proyecciones audiovisuales.

Uviéu quier ser "una ciudá acoyedora" pa toles persones, pero sobre manera pa los colectivos que vieron menguaos los sos derechos abondos años.

El consistoriu d'Uviéu nun ye l'únicu qu'amuesa esti compromisu. Otros ayuntamientos d'Asturies tamién se sumen a la conmemoración d'esti día colgando la bandera col arcu la vieya de les sos fachaes.

Munchos, como'l d'El Franco, piensen amás axuntase a la declaración de la Federación Española de Conceyos que promulga'l compromisu de garantizar la igualdá ente persones ensin importar la orientación sexual.