La reina recuerda a los músicos mozos que l'éxitu requier sacrificiu y esfuerciu

Inaugura los cursos de música de la Fundación Princesa

La Reina Letizia alvirtió güei énte un centenar de músicos mozos, qu'esti branu completen la so formación n'Uviéu, que p'algamar l'éxitu fai falta "munchu esfuerciu, trabayu, dedicación, disciplina y sacrificiu".

Doña Letizia inauguró güei, per quinta vegada, los Cursos de Branu de la Escuela Internacional de Música de la Fundación Princesa d'Asturies, nos que 143 alumnos de Bélxica, los Estaos Xuníos, Xapón, México, Portugal, el Reinu Xuníu, Rusia, Venezuela y España recibirán clases hasta'l 29 de xunetu por 26 profesores de siete nacionalidaes.

Nesta ocasión, el violinista cordobés mozu, y ex-alumnu de la Escuela de Música Internacional, Paco Montalvo, foi l'encargáu de pronunciar la conferencia inaugural na Sala de Cámara del Auditoriu Príncipe Felipe d'Uviéu.

"L'arte del violín flamencu" centró'l discursu d'esti músicu, qu'animó a tolos estudiantes presentes na sala a que disfruten d'esta esperiencia y que lo fagan con ilusión, porque tán nunu d'esos sitios "nos que se respira arte".

Montalvo (Córdoba, 1992), que participó en dos vegaes nestos cursos -la primer vegada va diez años- entamó a dar conciertos con seis años y a viaxar pel mundu con 11 pa tocar con delles orquestes, como la de L'Habana, ciudá na qu'actuó con 14 años, y a la que siguieron munches otres, como Nueva York, que recordó güei con especial cariñu.

Dempués de la so intervención abrióse un turnu d'entrugues al que, como yá ye tradicional nos últimos años, sumóse la Reina, que pidió a Montalvo qu'esplicare tamién l'esfuerciu, sacrificiu y disciplina qu'hai tres la so exitosa carrera.

"Si nun t'esfuercies daveres y te dediques al cien por cien ye bien complicao trunfar", retrucó Montalvo a doña Letizia, enantes de precisar qu'esi esfuerciu siempres ye muncho más llevaderu si se disfruta daveres de lo que se fai.

Centráu nel flamencu, señaló que col so violín ye quien a facer vibrar a miles de persones d'otros países, con música española a la que dedicó munches hores de la so vida "con alegría".

Dempués de la conferencia, el violinista cordobés, acompañáu pol guitarrista Jesús Gómez y el percusionista Miguel Santiago interpretó delles pieces d'Enrique Granados, Isaac Albéniz, Paco de Lucía y Miguel Matamoros, una actuación qu'algamó una gran ovación y que punxo al auditoriu en pie, incluyida la Reina.

Al acabar, nel vestíbulu del auditoriu, doña Letizia interesóse polos estudios de dellos alumnos d'esti añu dempués de facese una semeya de familia con tolos participantes.

Las clases abarquen los instrumentos de la plantilla sinfónico-orquestal y amás cuenten con asignatures de conxuntu musical, como orquesta moza y orquesta infantil, música de cámara, cuartetu de cuerda, conxuntos de vientu, de jazz y llibre improvisación.

Los profesores vienen de dellos centros de prestixu internacional ente los que tán el Brooklyn College, de la New York City University; de la Escuela de Música de la Universidá de Nevada en Las Vegas; del Institutu Nacional de Pedagoxía Musical "Ippolitov-Ivanov" de Moscú o de l'Academia Italiana de Clarinete; y d'orquestes como la Nacional d'España, la de Radio Televisión Española y la orquesta de cámara los Virtuosos de Moscú.

Como novedá, la Escuela pondrá en marcha'l ciclu "Música en ruedes", nel qu'acompañaos con una furgoneta 'vintage' como soporte, los alumnos ufiertarán conciertos en delles ubicaciones emblemátiques ente'l 24 y el 28 de xunetu.

La Reina foi espectadora d'escepción del primeru d'estos conciertos fuera l'auditoriu, onde seis alumnos de flauta travesera d'ente 16 y 25 años interpretaron delles pieces de Scott Joplin y Z. Abreu.

Tamién per vez primera nesta edición el públicu podrá disfrutar de "micro-conciertos teatrales", breves intervenciones musicales acompañaes de rellatos interpretaos por actores, la primera d'elles, mañana mesmu na plaza de la catedral d'Uviéu.

La Fundación Princesa d'Asturies entamó les sos actividaes nel área musical en 1990, al facese cargu col treslláu a Uviéu de la orquesta de Cámara "Los Virtuosos de Moscú" y de seis prestixosos profesores de música, y en 2005 punxo per primer vegada en marcha estos cursos de branu.