Simulacru de rescate en Valgrande-Payares

L’oxetivu ye "meyorar la coordinación y capacidá de rempuesta"

El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu del organismu autónomu, xunto col personal de la Estación Ivernal y de Monte Valgrande-Payares, ficieron güei un simulacru de rescate y evacuación nel remonte mecánicu d'El Brañillín, en L.lena.

L’exerciciu prácticu, qu’entamó al rodiu de les 9:30 hores y allargóse tola mañana, supunxo la inmovilización del arrastre mecánicu y el rescate y evacuación de los usuarios del telesiella, informó’l SEPA.

La maniobra de rescate llevóse alantre tanto per tierra, como pel aire, cola participación de l’aeronave medicalizada del equipu de rescate del SEPA.

Nel simulacru participaron cinco trabayadores de la estación ivernal y once efectivos del Grupu de Rescate de Bomberos del SEPA, ente rescatadores, médicos y pilotu.

Amás, dambos cuntaron cola collaboración de l’Agrupación de Voluntarios de Protección Civil de L.lena.

Según destacó’l SEPA, l’oxetivu d’esti tipu de práctiques a comuña ye "meyorar la coordinación y capacidá de rempuesta" pa que nel casu d’un posible fallu del remonte mecánicu, el rescate y evacuación de los usuarios atrapaos seya de la forma "más segura, rápida y eficaz posible".

Esti tipu d’exercicios qu'afonden na formación y capacitación de los que tán llamaos a intervenir nuna emerxencia real, permiten compartir, consensuar y poner en práctica procedimientos d’actuación colos que prestar un serviciu más eficiente a los ciudadanos.