Unes 27 empreses participen nel Salón de Gourmets en Madrid

La xata asturiana sedrá protagonista del I campeonatu nacional de cachopu

Un total de 27 empreses asturianes del sector agroalimentariu promocionarán la gastronomía del Principáu nel Salón de Gourmets 2017, ún de los eventos más importantes pa la internacionalización de los productos de calidá, que se fai en Madrid dende güei y hasta’l xueves.

Tamién asistirán a la cita’l Conseyu Regulador de la I.X.P. Xata Asturiana y l’Asociación de les Industries Cárniques del Principáu d’Asturies (ASINCAR), informó la Sociedá de Promoción Esterior del Principáu (ASTUREX).

Esta tarde la xata asturiana sedrá la protagonista del primer campeonatu nacional de cachopu que se fadrá nesti salón del gourment.

Quince d’estes empreses, amás d’ASINCAR, ufiertarán nel espositor d’ASTUREX prebes de productos asturianos, como miel, vinu, quesu, faba, corderu o xata.

Les demás empreses asturianes ocuparán dellos espacios del salón, onde tamién promocionarán otros productos, como’l xamón, la sidra o’l bacaláu.

Amás, esti Salón de Gourmets de 2017, que fai esti añu la so 31 edición, valdrá pa la presentación de productos anovadores como la sidra de xelu, el vermú de sidra o la sidra frizzante monovarietal con burbuyes.

Na edición d’esti añu ta prevista la participación de 1.630 espositores y 40.000 productos espuestos (1.300 nuevos), asina como la visita de 85.000 persones.

Amás, la organización invitó a un centenar d’importadores procedentes de 25 países.

L’axenda del Salón de Gourmets prevé la celebración de 2.400 xuntes y un volume de negociu d’unos 200 millones d’euros.