Piden al Principáu qu'aclare si la granxa escuela taba obligada a tener socorrista

La investigación policial sobre l'afogamientu del neñu ta a nada d'acabar

La Guardia Civil tien prácticamente acabaes les dilixencies policiales, a la espera de la respuesta que-y dea'l Principáu sobre les dos aclaraciones que pidió de la normativa pa determinar si pudo haber o non neglixencia.

Según la investigación, la piscina de la granxa escuela na que morrió afogáu'l neñu de cinco años tenía una fondura d'un metru ochenta.

L'actual decretu que regula l'usu colectivu de les piscines afita nun metru sesenta la fondura máxima pa nun tener socorrista. D'ehí que la Guardia Civil pidiera al Principáu si hai escepciones a la norma nesti puntu.

Otra de les aclaraciones refierse al númberu mínimu de monitores que tendría que tener por neñu. Nel momentu de los fechos, 17 guah.es taben faciendo una xera nel recintu de la piscina al cargu de dos monitores, una d'elles en práctiques. La Guardia Civil quier saber si ésta computa a la hora d'afitar el mínimu de neños por cuidador.

Según el decretu, tien qu'haber un mínimu d'un monitor, con diploma en xeres de tiempu llibre, por cada 10 neños.

A la espera de la respuesta del Principáu, la Guardia Civil tien como investigada, por homicidiu imprudente, a la directora de la granxa escuela.