Un home mata a la so muyer en La Felguera y tírase pela ventana

Asturies rexistra dos casos de matrimonios octoxenarios finaos por voluntá propia en dos selmanes

Un home mató güei a la so muyer, d’unos 80 años, nel domiciliu conyugal de La Felguera, nel conceyu asturianu de Llangréu, y dempués tiróse pela ventana y finó, según informaron fontes policiales.

El Tribunal Cimeru de Xusticia d’Asturies (TCXA) informó de que nun había denuncies enantes por violencia machista.

Los fechos conociéronse dempués d’atopar el calabre del home nel suelu embaxo la so casa, asitiada na cai Juanito Perotti, nel barriu de La Campa, pasaes les 7:00 hores.

Axentes de la Policía Nacional desplazáronse al llugar pa investigar los fechos.

Nuna primer inspección los axentes alcontraron na casa una nota manuscrita, al paecer escrita pol home y dirixida a los sos fíos.

El Xulgáu de Primer Instancia y Instrucción númberu 1 de Llangréu, en funciones de guardia, entovía nun recibió los atestaos rellacionaos col casu, pero ordenó yá’l llevantamientu de los dos calabres.

Amás, según informó’l TCXA, afitó que nun había "denuncies enantes rexistraes ente’l matrimoniu" por malostratos.

De confirmase que ye un nuevu casu de violencia machista, sedría’l segundu nel día de güei dempués de la muerte d’una ciudadana paraguaya nel barriu madrilanu de Tetuán a manos de la so ex-pareya.