Suicídase tres un atracu con rehenes en Cangues

Un prindáu, un guardia civil mancáu y tres rehenes soltaos

Un atracador suicidóse dempués de protagonizar un robu con rehenes nuna sucursal bancaria de Cangues d'Onís y tratar d'escapar nun tirotéu nel que se mancó un axente de la Guardia Civil, y nel que foi prindáu un segundu asaltante.

Los dos atracadores acababen de salir de prisión y teníen antecedentes. Nel casu del atracador fináu, ente otres coses, por robos a mano armada.

Los fechos fueron pasaes les 9:00 hores nuna sucursal bancaria de Liberbank asitiada na avenida de Cuadonga, en plenu centru de la capital canguesa.

Según detallaron fontes de la Guardia Civil, foi una muyer que diba entrar na sucursal dempués de los atracadores la que dio l'avisu al 112 al decatase de la situación.

Los dos atracadores intentaron abandonar la oficina bancaria cuando fuera yá esperaben dellos axentes, escontra los qu'entamaron a disparar.

Unu de los axentes recibió un balazu nun brazu, anque la so situación paez que nun tien gravedá.

Los guardies civiles respondieron con disparos y fueron quien a prindar a unu d'ellos, mientres que l'otru volvió dientro la sucursal, onde s'atrincheró con tres rehenes, dos empleaes y un veceru.

Los axentes facilitáron-y un teléfonu móvil pa ponelu en contactu con un negociador que lu convenció de que soltare a los tres rehenes -al rodiu de les 12:00 hores- y dempués pegóse un tiru que, de mano, dexólu n'estáu críticu y que finalmente provocó-y la muerte.

Los dos atracadores son orixinarios de Miranda d'Ebro (Burgos), y el prindáu de mano foi identificáu como J.M.S.V., nacíu en 1974, mientres que'l fináu J.C.S.G., nacíu en 1957.

L'atracu provocó una gran alarma ente los vecinos de la zona, dalgunos d'ellos espertaron col soníu de los disparos.

Una de les testigos, una clienta de la cafetería La Golosa, asitiada en frente la sucursal, relató que los dos atracadores salieren de la oficina bancaria y unu d'ellos entamó a disparar escontra los axentes, y qu'unu de los disparos pegó na fachada del local.

Los axentes, mientres refugaben l'ataque y procedíen a prindar a unu de los lladrones, pidieron a les persones que taben na cafetería, ente les que taba la directora de la sucursal, qu'esperaren dientro l'establecimientu.

Énte la situación de tensión xenerada pol atrincheramientu d'unu de los atracadores armáu y con dellos rehenes, la Guardia Civil caltuvo delles hores un ampliu cordón de seguridá pa evitar que s'acercaren curiosos.

Una vez acabada la so actuación, los axentes recibieron l'aplausu de los numberosos vecinos que taben na zona.