El Belles Artes recibe en donación y depósitu 200 obres d'Aurelio Suárez

Ye un artista "central" nel panorama del arte asturianu del sieglu XX

El Muséu de Belles Artes d'Asturies recibió en donación y depósitu más de 200 pieces documentales, artístiques y oxetuales d'Aurelio Suárez, que convierten a la pinacoteca nel principal centru d'estudios del creador.

El director del Muséu de Belles Artes, Alfonso Palacio, valoró la "contundente" donación y el "perbón" depósitu que supón l'inxerimientu del material aportao pol fíu del artista, Gonzalo J. Suárez Pomeda, al equipamientu museísticu.

Aurelio Suárez (Xixón, 1910-2003) ye un artista "central" nel panorama del arte asturianu del sieglu XX qu'algamó amás una notoria proyección nacional, como amuesa, por exemplu, la so recién selección pa la esposición Campu zarráu. Arte y poder na posguerra española, celebrada nel Muséu Nacional Centru d'Arte Reina Sofía, dixo Palacio na presentación de la donación.

Recordó qu'Aurelio Suárez cunta nel Muséu de Belles Artes d'Asturies con una sala monográfica dedicada a la so obra, de la qu'una parte del mediu centenar de creaciones espónse na sala 21, anque"faltaben coses por amestar", que se sumen agora a los fondos del artista al traviés de les donaciones y del depósitu de pieces.

El fíu l'artista detalló que la obra cedida inclúi una variada representación d'intervenciones del artista sobre caxes de baraxes, d'estampes, de bocetos y carpetes de trabayu, asina como una llámpara de techu diseñada por Suárez, una serigrafía, 4 ex-libris y dellos oxetos personales y papeles d'Aurelio, dalgunos d'ellos venceyaos al so interés pola astronomía.

Completa la donación otru bloque formáu por catálogos, folletos, cartelos d'esposiciones y una completa recopilación hemerográfica, qu'abarca toles alusiones al artista tanto en vida como dempués de morrer.

Un total de 1.121 artículos asoleyaos en prensa y 1.457 unidaes, qu'inclúin manuscritos d'Aurelio Suárez, formen la más completa recopilación sobre la dilatada trayectoria artística del creador.

Amás, un total de 11 oxetos artísticos siguirán depositaos con calter indefiníu nel Muséu de Belles Artes, ente ellos hai mázcares y figures tallaes, cares trabayaes en piedra y un azulexu decoráu.