Eva Suárez, valtando mitos sobre'l párkinson

Asegura que la tranquilidá y l'actitú positiva son determinantes

Eva Suárez ye una muyer de 42 años, profesora d'Economía na Universidá d'Uviéu, con dos fíos. Va tres años diagnosticáron-y párkinson y dende entós, llucha por llevar la meyor vida posible.

Quier compartir la so esperiencia pa valtar mitos sobre esta enfermedá. Una óptica guerrera cola que quier ayudar a los que carecen párkinson y contribuyir a una meyor conocencia d'esta dolencia nel conxuntu la sociedá.

Profesora na Universidá d'Uviéu, Eva siguió trabayando sufriendo los síntomes de la enfermedá. L'estrés agravó-y la dolencia y agora, tres años dempués, ta de baxa y sabe que la tranquilidá y l'actitú positiva son determinantes. Una actitú que la llevó a tener un segundu fíu cuando yá lluchaba cola enfermedá.

Eva Suárez pertenez a l'Asociación Párkinson Asturies, que fai un llabor de sofitu a los afectaos pola enfermedá. Terapia ocupacional, fisioterapia y llogopedia son delles de les atenciones sociosanitaries qu'ufierten.

El párkinson non solo afecta al sistema motor. La depresión ye otru de los síntomes y, por eso, Eva quier apurrir el so enfoque positivu. Lo peor pal paciente, asegura, ye nun entender la enfermedá.
El 15% de los casos de párkinson diagnostíquense en menores de 45 años.