José María Mellado esplica en Xixón los secretos de la fotografía

Consideráu unu de los fotógrafos más prestixosos del mundu

Unu de los fotógrafos más prestixosos del mundu, José María Mellado, ufierta esta tarde una conferencia en La Llaboral, Xixón.

Mellado quier tresmitir al que mira les sensaciones del instante que se captura. El so trabayu ta na colección permanente del Reina Sofía y el so nome ye una referencia en tol mundu.

Un divulgador de les técniques y procesos, que nun refuga les semeyes de móvil. Anque enxamás nun foi tan fácil facer una semeya, algamar que seya quien a conmover sigue siendo un retu estraordinariu.

Mellado tamién recuerda que siempres hai una intervención na fotografía. Yá la había nel momentu nel que yera revelada con métodos tradicionales.

Esti renomáu fotógrafu busca la belleza en cualesquier requexu pero, sobre manera, rastréxala no que puea paecer vulgar, ensin interés o decadente.