Alfredo Canteli, nuevu alcalde d'Uviéu col sofitu de Ciudadanos

Asegura que güei entama "un nuevu capítulu" pa Uviéu

El plenu del Conceyu d'Uviéu nomó esti sábadu al popular Alfredo Canteli como nuevu alcalde de la ciudá, tres cuatro años de gobiernu tripartitu del PSOE con Somos y IX, al recibir el sofitu de los nueve conceyales del so partíu y los cinco de Ciudadanos.

Na sesión constitutiva de la nueva corporación presentaron tamién la so candidatura los cabeces de llista de PSOE, Wenceslao López, y de Somos Uviéu-Podemos, Ana Taboada, que llograron namás el respaldu de los sos respectivos grupos, mientres que Vox, qu'anunciara'l so sofitu a Canteli, optó por abstenese.

Na so intervención énte'l plenu pa presentar la so candidatura, el conceyal popular señaló que güei entama "un nuevu capítulu" pa Uviéu que respuende al "inequívocu" deséu de cambéu amosáu polos ciudadanos nes últimes elecciones municipales.

Canteli, tres les crítiques dende los grupos d'oposición al regresu al poder d'un PP que gobernó la ciudá ente 1991 y 2015, alvirtió, dirixéndose directamente al so antecesor nel cargu, que llegaba a l'Alcaldía dende una trayectoria profesional previa "marcada pola honestidá y la honradez".