Acepta 26 años de cárcel por matar a un médicu en Grau

Acepta’l pagu d’indemnizaciones por un total de 62.500 euros a les dos fíes de la víctima

L’home acusáu de matar a un médicu xubiláu en Grau en 2016 pa roba-y 80 euros asumió l’autoría y aceptó una pena de 26 años y mediu de cárcel.

L’alcuerdu ente la so defensa y la Fiscalía, que de mano pidía una pena de 30 años de prisión, torgó la celebración del xuiciu con xuráu popular que taba señaláu pa esti llunes na Sección Tercera de l’Audiencia Provincial.

L’acusáu, D.J.J., apodáu "El Araña", aceptó una pena de 23 años de cárcel pol delitu d’asesinatu y otra de tres años, seis meses y un día por robu con violencia, col agravante d’abusu de superioridá, asina como’l pagu d’indemnizaciones por un total de 62.500 euros a les dos fíes de la víctima.