Radiotelevisión del Principáu d'Asturies Radiotelevisión del Principado de Asturias
Radiotelevisión del Principado de Asturias
RTPA - Radiotelevisión del Principado de Asturias
Fuente: RTPA, 20 de payares. 2017 21:27

Álvaro Nadal señala que la térmica de Lada nun pesllará si se demuestra que ye rentable

El ministro de Energía, Turismo y Agenda Digital, Álvaro Nadal y el presidente del Principado, Javier Fernández
Álvaro Nadal señala que la térmica de Lada nun pesllará si se demuestra que ye rentable

Los nuevos fondos mineros movilizarán 158 millones nunes 127 actuaciones

El ministru d’Enerxía, Álvaro Nadal, dixo güei n’Asturies que la térmica de Lada nun pesllará si se demuestra que ye rentable.

Foi dempués d’una xunta col presidente del Principáu, Javier Fernández, pa roblar el nuevu conveniu marcu de los fondos mineros.

Los fondos mineros correspondientes al periodu 2013-2018 movilizarán n’Asturies una inversión d’unos 158 millones pal desendolcu d’unes 127 actuaciones nes cuenques mineres, les más d’elles rellacionaes con infraestructures y la restauración de zones degradaes.

El ministru d’Enerxía, Turismu y Axenda Dixital, Álvaro Nadal, y el presidente del Principáu, Javier Fernández, roblaron güei n’Uviéu’l conveniu marcu pa la execución d’estos proyectos de los que 92 fueron propuestos polos ayuntamientos y 32 dende’l Gobiernu rexonal, que financiará polo menos el 25 por cientu de caún d’ellos.

Sicasí, sedrá agora una comisión integrada pol Principáu y l’Institutu del Carbón la encargada nes selmanes vinientes de determinar qué actuaciones se fagan y les condiciones de financiación, execución y xustificación.

Estos fondos -250 millones a repartir ente Asturies, Castiella Lleón, Aragón y Castiella-La Mancha, principalmente- son independientes de los 213 millones qu’Asturies reclamó xudicialmente al Estáu por fondos mineros d’enantes al añu 2011 que nun fueron abonaos nunca a l’alministración autonómica.

D’esta delda, reconocida por sentencia xudicial, el presidente asturianu señaló que, como s’alcordó, cada conveniu oxetu de reclamación ta siendo esamináu y revisáu pola comisión mesta constituyida pa esi efectu.

De los nuevos, el ministru robló que "se trabayó a esgaya" pa poder llegar a esta robla, "que ye unu de los bonos exemplos de lo que se pue facer cuando hai bona coordinación" ente alministraciones.

Na so opinión, esti conveniu marcu va a permitir la robla de proyectos concretos y qu’éstos s’executen "de forma rápida y ensin problemes alministrativos".

Nadal reconoció que la "minería del carbón sufrió una crisis perimportante, y que necesita sofitu institucional" y que’l conveniu marcu robláu güei amiéstase al sofitu de l’alministración central n'ayudes a la producción o pa la reconversión de los trabayadores del sector.

El ministru cifró nunos 400 millones d’euros el dineru que l’Executivu destina a les comarques mineres y aseguró que l’añu viniente, en casu de que nun salga alantre’l Presupuestu del Estáu, volveríen a cuntar cola mesma asignación qu’esti exerciciu.

Dempués de señalar que la robla d’esti alcuerdu ye una bona anuncia pa les cuenques y p’Asturies entera, el xefe del Executivu asturianu insistió en que ye tamién un "actu de xusticia" pa les comarques mineres y un sector que llegó a dar trabayu a más de 52.000 trabayadores el sieglu pasáu.

Fernández insistió en que’l desendolcu de les 127 actuaciones propuestes va a suponer un "gran esfuerciu económicu" p’amenorgar les consecuencies del pieslle d’esplotaciones.

Asina, el presidente asturianu recordó que l’añu viniente ta previstu’l pieslle de les esplotaciones non competitives o, nel so casu la devolución de les ayudes públiques y que fai falta qu’España reivindique énte la Xunión Europea la fecha y condiciones del pieslle.

El plan de la Minería del Carbón 1998-2005 destinó a Asturies 1.333 millones d’euros pal desendolcu de 125 proyectos, cantidá de la que recibió 1.171 millones.

Del siguiente plan, el previstu pal periodu 2006-2012, el Principáu recibió 156 de los 490 millones que se-y concedieren p’acometer 257 proyectos, según los datos que manexa’l Gobiernu rexonal.

banner publicidad

© 2024 Radiotelevisión del Principado de Asturias | Todos los derechos reservados

Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL